Island sumiginnagaasutut misigisimavoq
Præsidenti misigisimavoq, nunat taaneqartut Islandip aningaasaqarnikkut ajornartorsiuleruttornerani sumiginnaasimasut, Ritzauimi taama allaaserinnittoqarpoq. Aamma taassuma oqaatigaa, nunanik allanik suleqatissarsiorniarluni.
Nunat siuarsagassat taarsigassarsiniartarfiannit Islandip 2,1 milliard koruuninik atukkerneqarnissaa neriorsuutigineqareerpoq, taamaattorli taarsigassarsiniartarfiup atukkiinissaq suli akuersissutigisimanngilaa.
Atukkiinissaq Islandimut pingaaruteqartorujussuuvoq, tassami Nunat siuarsagassat taarsigassarsiniartarfiata atukkiinissaat aatsaat qulakkeerneqareerpat, nunat avannarliit allat atukkiisinnaanertik nalunaarutigereermassuk.