Island Savalimmiunut ikiuinialerpoq

Islandip avannaamiut aningaasanik katersillutik aallartipput, aningaasat katersukkat Savalimmiuni nunaqarfiit ilaannut Skálavik-imut Sandøenimiittumut tunissutiginiarneqarput. Savalimmiuni jannuaarimi anorersuarujussuallarmat nunaqarfik taanna sakkortoqisumik immamiit ulissuarfigineqarsimavoq taamaalillunilu pinngortitaq qaqugumulluunniit allanngorujussuarsimalluni.

Umiarsualivik umiatsiat illullu sequmilluinnarsimapput. Anorersuup aserugai tamakku annertungaarmata iluarsartuunnissaanut kommunilluunniit nammineq naammattumik akissaqartissimanngilai, taamaattumillu Savalimmiuni namminersornerulluik oqartussaasut qinnuigineqarsimapput aningaasanik ikiuinissaannik.

Islandimi aningaasanik katersiniartoqarnera akissuteqarluni qujaniarnertut aamma taaneqarsinnaavoq, tassami ukiut 13-t matuma siornatigut Islandimi illoqarfiit ilaanni Flateyri-mi amiilaarnaqisumik aputip sisoorneratigut aseruineqarsimaqaaq inunnillu ajunaarneqarsimalluni. Taamanikkut Savalimmiormiut Islandimiunut misiginneqataallutik aningaasarpassuarnik katersuiniarsimapput.