Island nunanit allanit isorineqarpoq

Aningaasarsiutigalugu arfanniartarnerup aallarteqqinnissaanik Islandimi naalakkersuisut aalajangernerat, nunanit arlalinnit iluarineqanngilaq. USA-mit, New Zealandimit aamma Tuluit Nunaannit isornartorsiuisoqarpoq. Islandimi naalakkersuisut aalajangernerat allanngorneqarsinnaanersoq EU-p kommissionianit ullumikkut kajumissaarutigineqarpoq.

Imaani nerisaqaqatigiit akornanni arferit malussarissorujussuupput, assersuutigalugu inuit imaanik mingutsitsinerannit arferit ikiliartorput.

EU aalajangiisinnaatitaasuuppat aningaasarsiutigalugu arfanniartarneq inerteqqutaalluinnassagaluarpoq, EU kommissionip nalunaarutaanni taama allassimasoqartoq, nutaarsiassaqartitsivimmit Reuterimit tusarliunneqarpoq.

Islandimi naalakkersuisut aalajangernerat allanngortinneqaqqullugu tuluit aalisarnermut ministeriat islandimiut TV-qarfiatigut ippassaq kajumissaarivoq.

Avatangiisinik illersuiniaqatigiiffiit arlallit aamma avoqqaarinnipput.

Nunarsuarmi avatangiisinik illersuiniarluni sakkortuumik oqaaseqartartoq, Paul Watson, aviisimut Frettabladid-imut ippassaq oqarpoq, aasaru Reykjavikkimukarniarluni. Taama oqarnermini sioorasaarisutut isigineqarpoq.

Paul Watsonip suleqataasalu avatangiisinik illersuiniarlutik arfanniutit marluk Reykjavikip umiarsualiviani ukiut 20-t matuma siorna kivisippaat.