Island EU-mut qanillattorpoq
- Maanna aalassassimaartoqaleruttornerani, periarfissatut isigisavut tamaasa misissoqqissaartariaqarpavut, naalakkersuisuni EU-mut akerlilersuinerpaaq, aalisarnermut ministeri Einar Gudfinsson Islandip radiuanut taama oqarpoq.
Aamma nunanut allanut ministeri Ingibjörg Sólrún Gísladóttir, aviisimi Morganbladid-imi oqallissaarilluni EU-mut ilaasortanngornissaq pillugu allaaserisaqarpoq.
- Piffissaq qaninnerusoq eqqarsaatigalugu imminut illersorniarluta Nunat Siuarsagassat Taarsigassarsiniartarfiat suleqatigisariaqarparput, ungasinnerusorlu isigalugu EU-mut ilaasortanngortariaqarluta, euro atulerlugu Europamilu naalagaaffiit Aningaaserivissuannit tapersersorneqalerluta. Socialdemokratit nunanut allanut ministeriutitaat, siornatigut EU-mut ilaasortanngornissamik saqqummiussisareersoq allappoq.
Islandip EU-mut qanillattorsinnaanissaa, maannamut Islandimi aalisarnikkut inuussutissarsiortunit pissaaneqaqisunit unitsinneqartuartarnikuuvoq.
EU-kommissionimit oqaaseqartitaq oqarpoq, ilaasortanngorniartoqassappat tamanna sukkasuumik suliarineqarsinnaassasoq, tassami Island maanna Europamiut aningaasarsiornikkut Suleqatigiinnerannut ilaareermat.
