Island: EU-mut akerliusut suleqatigiikkusupput
Kisianni apriilip 25-anni Altingimut qinersisoqarnissaani talerperliuniat saamerliuniallu Islandip EU-mut ilaasortanngornissaa akerleralugu kattusseqatigiittut suleqatigiinnialersaalerput.
Siorna oktobarimi aningaasaqarniarnikkut Island nakkaalluinnalermat, Islandip EU-mut ilaasortanngorluni euromik aningaasaqalernissaa amerlasuunit orniginartinneqaleraluarpoq.
Aningaasaqarniarnikkulli ajornartorsiorneq aaqqiiviginiarlugu aningaasat Islandimut isaaneri ilutigalugit EU-mut ilaasortanngorusunneq milliartoqqilerpoq.
Islandimi naalakkersuisoqatigiikkallartut EU-mut tunngasut isumaqatigiissutigisinnaanngilaat, EU-mulli ilaasortaanermut apeqqutip qineqqusaarutinut ilaanissaa partit tamarmik ilimagaat. Taamaammat imaassinnaavoq kingusinnerusukkut EU-mut ilaasortanngornissaq pillugu Islandimi taasisitsisoqartoq.
Apriilimili qinersineq sioqqullugu EU-mut ilaasortanngorsinnaaneq eqqartorneqarpiarani, Islandip piaarnerpaamik aningaasaqarniarnikkut ingerlalluaqqilernissaa eqqartorneqarnerpaassasoq qularnanngilaq.
