Island: Aningaaseriviup isertugaatai saqqummiunneqarput
Pappiara uppernarsaat isertugaalluinnartoq internetip quppernerani Wikileaksimi tamanut saqqummiunneqarpoq, tassanilu Kaupthinip amerlasoorsuarnik taarsigassarsisitarisimasai nalunaarsorneqarsimallutik. Paasinarsivorlu taarsigassarsiat amerlanerpaartaat aningaaseriviup iluani inunnut aningaaserivimmut attuumassuteqarluinnartunut tunniunneqartarsimasut. Amerlanertigut nalorninartumik naliliisoqartarsimaneranik tunngaveqartumik.
Tamatumani ilaatigut pineqarput qatanngutigiit August aamma Lydur Gudmundson taakkualu aningaasaqarnikkut suliffeqarfissuat Exista, taarsigassarsiat tunniunneqarmata Kaupthinimi amerlasoorsuarnik piginneqataassuteqartoq.
Taarsigassarsiat qatanngutigiit Gudmundsonikkut nammineq atugassaasut tunniunneqarsimasut, aviisi Svenska Dagbladet allappoq. Ilaatigut Frankrigimi illumut nammineq pigisaanut atorneqarlutik. Islandimi universitetimi aningaasaqarnermut ilisimatooq Vilhjálmur Bjarnason Berlingske Tidendemi naliliivoq, taarsigassarsiat arlallit toqqaannartumik inatsisitigut unioqqutitsinerusut.
Akiligassanut allattuiffimmi taarsigassarsiat tamarmik immikkut 335 millionit koruuniusut nalunaarutigineqarput. Amerlanerpaanik taarsigassarsisut quliusut tamarmik 47 milliardit koruuninik taarsigassarsisimapput. Taakkua Islandip ukiumut aningaasanut missingersuutaasa marloriaatigaat.
