Islamisk Stat Parisimi saassussisuuvoq

Frankrigip præsidentia Francois Hollande inuiannut oqalugiaateqarluni taama ilisimatitsivoq.

Præsidenti naapertorlugu tallimanngormat unnukkut saassuussinerit Frankrigip avataaneersunit piareersarneqarsimapput Frankrigimiittullu suleqatigalugit ingerlanneqarsimalutik.

Videomi ullulerneqanngitsumi ullumi arfininngornermi avammut saqqummiunneqartumi peqqarniisaarniaqatigiit Islamisk Statip nalunaarutigaa peqqarniisaarniarneq Frankrigip Syriami timmisartunik sorsuutinik saassussineranut qisuariarnerusoq.

Aamma atuaruk Kunngikkormiut Frankrigip Københavnimi aallartitaqarfiata saavani eqqaaniaaqataasut

Aamma atuaruk Attaveqaqatigiittarfinni #Paris pillugu nutaarsiassat kingulliit

Parisimi saassussinerit pingasut
Frankrigimi illoqarfiit pingaarnersaanni saassusinerit aallartipput café Petit Cambodge saassunneqarmat. Biilip tallimanngormat unnukkut, Frankrigimi nalunaaqutaq malillugu nal. 21.30 café saneqquppaa aallaasersorfigalugulu.

Tamatuma kingorna Frankrigimi arsaattarfissuup Stade de Francep, Frankrigip Tysklandillu ikinngutigiittut unammiffigisaata silataani inuit pingasut imminnut toquutigalutik qaartartut qaartippaat. Arsaanneq unitsinneqarpoq Frankrigimiullu præsidentiat arsaattunik isiginnaartuusoq arsaattarfimmit qimagutsinneqarpoq. Peqqarniisaarniat arsaattarfiup iluanut isinngillat.

Saassuussinerit pingasuat aassunninnerpaarlu tusarnaartitsisarfimmi Bataclanimi pivoq. Peqqarniisaarniat pingasut tusarnaartitsisarfimmi tusarnaariat 1.500-t najuuffigisaanni sallunaveeqqutitut tigusarinnipput. Tusarnaartitsisarfik politiinit nal. 00.30-p missaani iserterfigineqarpoq. Inuit 100-t missaat tusarnaartitsisarfimmi ajunaarput.

Nunarsuarmi nunat siuttui arlalissuit inuiaat franskit misiginneqatigalugit nalunaaruteqarsimapput.