Isjordcenterimut tapiissuteqarneq Qaasuitsup kommuneani nuannaarutigineqartoq
Illorsuassaq Isfjordscenteri nunatsinnut tamarmut iluaqutaassaaq, Palle Jeremiassen oqarpoq.
- Ilulissat kangerluata misissuiffigineqarnerata killiffia illorsuarmut isertunut tamanut paasisaqarfigineqarsinnaavoq aamma nunarsuarmi silap pissusaata allanngoriartorneranut takussutissat saqqummersinneqassapput, Palle Jermiassen oqarpoq. Isfjordscenterimi - Ilulissat kangerlua pillugu illorsuarmi Kalaallit Nunaata oqaluttuarisaaneranut kulturimullu tunngasut aamma saqqummersinneqartassapput.
Aamma atuaruk Realdania Ilulissat kangerlua pillugu illorsuassamut 75 millioninik aningaasaliivoq
Takornariat nunanit allanit tikittut Ilulissat kangerluanukartinnatik, Isfjordcenterimi paasissutissanik pissarseqqaarlutik Ilulissat kangerluanut ingerleqqissinnaapput, Palle Jeremiassen oqarpoq.
- Taamaattumik illorsuaq Kalaallit Nunaanni inuiaqatigiinnut tamanut iluaqutaasussaavoq, Ilulissat uani kisimik pineqanngillat, Palle Jeremiassen taama oqarpoq.
Suli amigaateqarput
Illorsuup sanaartorneqarnissaanut 10 million koruuninik suli amigaatigineqarput.
Aningaasat taakkua aningaasaateqarfimmit manna tikillugu ilisimaneqanngitsumit pissarsiarineqarnissaat, Namminersorlutik Oqartussanit, Realdania-imit Qaasuitsup kommuaniillu neriuutigineqarput.
Aamma atuaruk Politikerit illorsuarmut tapersiisut
Ilulissat kangerlua pillugu illorsuassamut nalunaarusiami Realdania-imit suliarineqartumi pisortatigoortumillu saqqummiunneqanngitsumi allassimavoq Qaasuitsup kommunia aamma Namminersorlutik Oqartussat 23 million koruuninik aningaasartuuteqassasut.
Taamaattumik Qaasuitsup kommunia ukiunut tulliuttunut sisamanut ukioq 2018-ip tungaannut illorsuassamut atorneqartussanik 8 million koruuninik missingersuusiorput, sinneruttut 15 million koruuninik Namminersorlutik Oqartussat Qaasuitsup Kommuneatalu akornanni isumaqatiginniutigineqassapput qanoq agguataarneqassanersut, Palle Jeremiassen oqarpoq.
Ukiut tamaasa 2 million koruunit
Isfjordcenterip ingerlanneqarneranut missingersuutit saniatigut ingerlanneqarneranut 2 million koruuninik siunissami ukiut tamaasa pisariaqartinneqarput.
Isfjordcenterip ukiumut ingerlanneqarneranut 1 million koruuninik Qaasuitsup kommuniata amigaatigai, taakkualu kommunemit akilerneqarsinnaanersut kommunalbestyrelsemi nalilersorneqarlutik aalajangiiffigineqarsinnaapput.
Aningaasartuutit sinneri illorsuarmut isertut takornarianiillu akiliutigineqartunit matussuserniarneqarput.
