Isiluttut Reykjavik nanisiaraat
Reykjavikkimi isiminnik suliaritillutik qinnguartartikkiartortartut nunatsinneersut amerliartorput, aamma nunanit Islandimut qanittunit pisut, ingammik Savalimmiunit, Norgemit Sverigemiillu pisut amerliartorput.
- Ukiuni kingullerni marlunni amerliartornerat malugaarput, Reykjavikkimi isit nakorsaat Jóhannes Kristinsson KNR-imut oqarpoq.
- Isiminnik qinnguartartillutik suliaritikkiartortut Kalaallit Nunaanneersut qanoq amerlatiginerat kisitsisaatiginngilagut, isumaqarpungali ukiuni kingullermi qulit 20-illu akornannik amerlatigisut suliaritikkiartortartut, Jóhannes Kristinsson oqarpoq.
Tamanna sioqqullugu Kalaallit Nunaannit suliaritikkiartortoqarsimanngilaq Jóhannes Kristinsson oqarpoq. Jóhannes Kristinssonip isinik qinnguartartilluni suliffeqarfiutaa 2001-imi aallartippoq.
Reykjavikkimi qinnguartartilluni suliaritikkiartortut ilagaat, 42-nik ukiulik Johan Rosbach Nuummeersoq. Taanna arfineq marlunnilli ukioqarluni isarussanik atuisuuvoq, maannakkullu isarussanik atuisariaaruppoq.
Johan Rosbach nalunaaquttap akunnerata ataatsip missaani isit nakorsaanit qinnguartartilluni suliaritippoq.
Johan Rosback isaruaqarallarami isaruaasa sakkortussusii minus 4-put, qinnguartartillunilu suliaritinnermi kingorna isaruaqarani nalinginnaasumik isigisaqalerpoq.
Islandimi isit qinnguartarlugit suliaritittarfiit marluupput, taakkualu tamarmik Reykjavikkimiipput. Isit qinnguartartinnerinut suliaritinnerit danskit koruuninngorlugit 13.000-it 14.000-illu missaannik akeqarput.
