Isiginnartitsissusiaq Århusimi nuannarineqarluartoq
”Isiginnaartitsinermit misigisatsialak” – taamatut Århus Stiftstidendep isiginnaagassiaq nutaaq Svendborgimi isiginnaartitsivimmiit ”Teater 2 Tusind”-imiit takutinneqartoq allaaseraat, naliliinermilu arfinilinnik ulloriartalerneqarsinnaasumi ullorissanik tallimanik tunillugu.
Isiginnaagassiaq qallunaatut ateqarpoq” Det Hungrende Bæst” - kalaallisuunngorlugu ”Uumasupiluk kaattoq”.
Isiginnaagassiami isiginnaartitsisuupput Rasmus Lyberth, qallunaarlu 70-ikkunnili supputaasarluni kalaallit nipilersugaanni sunniuteqarluarsimasoq, Christian Søgaard.
Isiginnaagassiami oqaluttuatoqaq ”Nanu” aallaavigineqarpoq, tassani oqaluttuarineqarpoq arnaq toqungasumik meerartaarami nanuaqqamik meerarsiartaartoq.
Isiginnaagassiami Kalaallit Nunaata sermersuaniit qavungarsuaq sissanut sioraannarnut palmerasaartunut ingerlaarput.
- Angakkuartutut ipput, Kirsten Dahl Århus Stiftstidendemiit naliliisartoq oqarpoq.
- Kalaallit anersaavat oqaluttuatoqaallu kalaallisut qallunaatullu taalliortorpalaartumik oqaluttuarineqartut tusarusukkaanni ”Uumasupiluk Kaattoq” takusariaqarpoq, naliliisartoq allappoq, tassalu ”Teater 2 Tusind”, Århusimi isiginnaartitsinerat naliliinermini arfinilinnik ulloriartalerneqarsinnaasumi tallimanik ulloriartalerpaa.