Isiginnaartitsisartunngorniarfimmi ilinniartoq ataasiinnanngortoq

Nunatsinni isiginnaartitsisarneq ukiuni makkunani ingerlalluarpoq, kalaalerlu isiginnaartitsisartoq, Danmarkimi isiginnaartitsisartunut nersornaammik akimanerpaamik - Årets Reumertimik - ukioq manna juunimi nersornaaserneqarpoq. Taamaattorli Isiginnaartitsisartunngorniarfik ajornartorsiorpoq, Sermitsiaq.AG allappoq.

Ataasiinnarmimmi maanna ilinniartoqarpoq, sinneri ilinniarnerminnik taamaatitsisimammata.

Nuummi Isiginnaartitsisartunngorniarfik ukioq ataaseq allortarlugu Juullip nalaani nalinginnaasumik taamaallaat ilinniartoqalertarpoq, Isiginnaartitsisartunngorniarfillu ingerlaannarnissani qulakkeerniarlugu aasaanerani sulinngiffeqareernerup kingorna tallimanik nutaanik ilinnialertoqartariaqalerpoq.

Nuummi Isiginnaartitsisartunngorniarfiup ataasiinnarmik ilinniartoqarnera kultureqarnermut naalakkersuisup Ane Lone Baggerip ajuusaarutigaa.

Isiginnaartitsisartunngorniarfik pisortanit ukiumut 1,8 millionit koruuninik aningaasaliiffigineqartarpoq, Isiginnaartitsisartunngorniarfillu Nunattalu Isiginnaartitsisarfia ataatsimut ingerlanneqarput, ataatsimullu 9,9 millionit koruuninik ukiumut aningaasaliiffigineqartarlutik.

Qinnuteqaateqarnissamut ulloq killigititaq tassaavoq aggustip ulluisa qulingiluaat. Tamanna pillugu NUIS.gl-imi paasisaqarnerusinnaavutit.