Isiginnaartitsisartoq Viggo Mortensen tusagassiortunut Nuummi katersuutsitsinermi peqataasoq
Isiginnaartitsisartoq Viggo Mortensen, danskinit Amerikarmiunillu naggueqartoq, senatorit USA-meersut sisamat peqatigalugit tusagassiortunik Nuummi katersuutsitsinermi tusarnaartut akornanniippoq.
Tamanna tusagassiortunik katersuutsitsinermit, senatorit nunatsinnut tikeraarneranut tunngasumi, assilisanit takuneqarsinnaavoq.
Viggo Mortensen tusagassiortunik ataasinngornermi katersuutsitsinermi sooq peqataanersoq paasineqanngilaq, tamannalu DR-imut, isiginnaartitsisartumit oqaaseqartitsiniaraluartumut erseqqinnerusumik aamma oqaatigiumanngilaa.
Isiginnaartitsisartoq Kalaallit Nunaat pillugu oqallinnermut januaarip naanerani akuliuppoq.
Mortensen, filmini "Ringenes Herre"-mut tunngasuni pingasuusuni Aragornitut inuttaanini pillugu tusaamasanngortoq, Sjællandske Nyhederimut oqallissaarummik taamani ilanngutassiivoq.
Kalaallit Nunaat USA-mit tiguarneqassanngippat Danmark, Kalaallit Nunaat Europalu sapinngisartik tamaat iliuuseqartariaqartut ilanngutassiamini pingaarnertut oqariartuutigaa.
- Susoqaraluarpalluunniit, innuttaasutut danskit kalaallillu naalakkersuisui Trumpip qunusaaraluni anguniagaqarneranit salloqittagaaqqunagit qinnuigaakka, Kalaallit Nunaallu ilamerngaluunniit USA-mut - nunamulluunniit allamut - tunniuteqqunagu, taanna allappoq.
"Nuuk sapaammi"
Donald Trump 2025-p aallartinnerani USA-mi præsidentinngoramili, USA-p Kalaallit Nunaannik aqutsinerulernissaanik kissaateqarnera arlaleriarluni sammineqarpoq.
USA-p Kalaallit Nunaat isumannaallisaanermut tunngasut pissutigalugit pisariaqartikkaa, USA-p præsidentiata oqaatigisarpaa. Nunarput præsidentioqqaarnermi nalaani aamma pisiariumavaa.
Viggo Mortensen qanoq sivisutigisumik Nuummiissimanersoq ilisimaneqanngilaq.
Taannali sapaammili Nuummiippoq, danskip piviusulersaarusiortup Christopher Guldbrandsenip Viggo Mortensenip naalakkersuisullu siulittaasuata Jens-Frederik Nielsenip (D) assingat Instagramikkut sapaammi saqqummiummagu.
- Piniarneq, filmit nunarsuarlu allanngorartuartoq oqaloqatigiissutigineqarput, Guldbrandsen sapaatiummat allappoq ilanngullugulu "Nuuk sapaammi".
Uummalliornartoq
Republikanerit senatoriata Lisa Murkowskip Alaskameersup, demokraatiusimasullu maanna attuumassuteqanngitsutut inissisimalluni senatoriusup Angus King Mainemeersup, demokratiusup Gary Peters Michiganimeersup aamma demokratiusup Maggie Hassan New Hampshiremeersup, nunatsinni illoqarfiit pingaarnersaat, Nuuk, sapaatip akunnerata naanerani tikeraarpaat.
Inuussutissarsiortut, Inatsisartut Naalakkersuisullu ataatsimeeqatigivaat.
Lisa Murkowskip kalaallit tusagassiortunik katersortitsinermi toqqaannartumik oqariartuuteqarfigigai, Sermitsiaq allappoq.
- Ulluni makkunani nalorniffiusuni qanoq isumakuluuteqartiginersi annilaangatiginersilu uummalliutigaara, taanna oqarpoq.
- Præsidenterput qanorluunniit oqaraluarpat, eqqaasikkumaarpassi, Kongressimi inissisimaffeqarpugut pingaarutilimmik. Isumaqarpungalu tamatta soqutigisaqartugut suleqatigiissutigisariaqakkatsinnik, tamannalu ataqqeqatigiinnermik oqaloqatigiinnermillu aallaaveqarlunilu naammassineqassaaq.
/ritzau/
