Isiginnaartitsisarfik: Periusissiaq immikkuualuttukippoq

Annertuallaaqaaq annikitsualukkuutaanillu nassuiaatitaqarani, pisortaq oqarpoq.

Sven B. Syrenip assersuutitut eqqaavaa Naalakkersuisut pilersaarutaanni isiginnaartitsisartut ilinniarsimasut isiginnaartitsisartunik ilinniarsimanngitsunik tapersersuisarnissaat, kommuunit kultureqarnermut sunngiffimmilu immikkoortortaat peqatigeqqissaarlugit pisassasoq.

Tassani isiginnaartitsisartut kikkut pineqarpat, pisortaq Svenn B. Syrin aperivoq.

Uatsinni ilinniarsimasut pineqarpat? Nunatta Isiginnaartitsisarfianut qanoq attuumassuteqarpat? Attuumassuteqarpat? Attuumassuteqanngippatami, aningaasaateqanngingajappugummi. Amerlasuunik atorfinitsitsisinnaanngilagut. Isiginnaartitsisartugut nunaqarfinni, illoqarfinni kommuninilu nammineerlutik suliassarsiortarput, Nunatta Isiginnaartitsisarfiani pisortaq Svenn B. Syrin oqarpoq.

Isiginnaartitsisartut ilinniarsimasut peqataatinneqassapput,  angalallutillu sinerissami siunersiueqateqarlutik ilinniartitsisassapput. Naalakkesuisut pilersaarutaanni allassimavoq.

Kommunilli aningaasarliorput, Nunatttalu Isiginnaartitsisarfianut aningaasaliissutit killeqarlutik, pisortaq oqarpoq. Taarsiullugu siunnersuuteqarpoq akiliummik taarsiisitsisalerneqartariaqartoq, soorlu Danmarkimisut. Taamaalilluta qulakkeersinnaavarput isiginnaartitsissutit aamma sinerissami takutinneqartarnissaat.

- Isiginnaartitsiartorniarutta kommuninut qinnuteqaateqassaagut. Taakku Naalakkersuisoqarfimmut ingerlateqqissavaat tassanilu akurineqarluniluunniit itigartinneqassaaq. Pitsaassusaa apeqqutaalluni. Akuerineqarunik tikilluaqqussavaatigut, akiligassarlu naalakkersuisoqarfimmut ingerlateqqillugu. Taamaalilluta sineriammukarsinnaalissaagut, kommunimmi nalunaarajupput aningaasaataarussimallutik.

Ilinniartitaanermut, Ilageeqarnermut, Kultureqarnermut Naligiisitaanermullu Naalakkersuisoqarfik aaqqiissuteqarniarluni attavigisimavaa. Maannamulli akissutisisimanngilaq, nangipporlu:

- Maannakkut qaaqqusissut nutaaq aallartippara. Oqaloqatigiilluta siunissami isiginnaartitsinerit pitsaanerit inunnut amerlanerusunut siunissami apuussinnaajumallugit, Nunatta Isiginnaartitsisarfiani pisortaq Svenn B. Syrin naggasiivoq.

Nunatta Isiginnaartitsisarfia ukioq manna 7,2 millioner koruuninik tapiiffigineqarpoq, siorna 10 millionit koruuninik tapiiffigineqarsimalluni.