Isiginnaartitsinissamut sungiusaleruttorput
Isiginnaagassiaq "Plus Minus Nul" pingasunngorpat apriilip ulluisa 27-anni takuteqqaarneqartinnagu, isiginnaartitsisartut, nipilersortartut qitittartullu Europap affaaneersut, Kalaallit Nunaat aamma ilaalluni, Katuami sungiusaleruttorput.
Isiginnaagassiortoq, Europami nersugaanerpaat ilaat, isiginnaagassiami ilitsersuisuuvoq. Tassa schweizimiu, Christoph Marthaler, Europami annertoorsuarnik arlaleriaqaluni isiginnaagassiortareersoq, nuannarineqarnerujussuarminilu akissarsisinneqartarsimaqisoq, isiginnaagassiami uani ilitsersuisuuvoq.
Isiginnaagassiap aqqa, "Plus Minus Nul", nunamut killeqarfigisamut aalaakkaasumut saattumullu assersuutaavoq. Tassa nunavimmut sikumullu saattumut. Tamanna Kalaallit Nunaanni immaqa nalunnginneqarnerpaavoq.
Kalaallit Nunaanni oqaluttuatoqqat ileqqutoqqallu, inuunermi misilittakkat siunissamullu takorluukkat isiginnaagassiami nipilersornikkut allatigullu takutinneqassapput, Kalaallit Nunaanni silap pissusaata allanngoriartornera politikkullu ineriartornerneq, isiginnaartitsissutigineqassallutik.
Kalaallini peqataassapput Nukâka Coster-Waldau aamma Kassaaluk Qaavigaq.
Takutitseqqaarneq Katuami pingasunngorpat apriilip ulluisa 27-anni pissaaq. Taassuma kingorna apriilip ulluisa 29-anni, 30-anni maajillu ulluisa aallaqaataanni takutinneqaqqissalluni. Isiginnaartitsisartut Europamut kingorna angalaassapput, isiginnaagassiaq Det Kongelige Teaterimi ilaatigut aamma takutinneqassalluni.