Isiginnaartitsinermut inatsit ersaartaassutigineqarpoq

Inatsisissamik nutaamik Inatsisartut aalajangiigaagata ersaartaattoqarneq ajoraluarpoq. Ippassarli taama pisoqarpoq, Kalaallit Nunaanni isiginnaartitsinermut inatsit akuersissutigineqarmat.
Allattoq Apollo Jeremiassen
oktobarip 20-at 2010 05:25

Inatsisartut ataatsimiittarfianni ersaartaannerit allatigullu nipiliornerit inerteqqutaagaluarput. Isiginnaartitsisartut inatsisissaat akuerineqareersorlu, tusarnaariat ilaatigut isiginnaartitsisartut ilitsersuisartullu ersaartaatilermata, Inatsisartut siulittaasuata, Josef Motzfeldtip taamaaliortoqarnera tunniutiinnarfigaa.Tamanna Sermitsiaq.ag-mi allaaserineqarpoq.

Kultureqarnermut Naalakkersuisup, Mimi Karlsenip akuersissutigineqartoq nuannaarutigeqaa, oqarluni, "Nunatsinni tamattaalluta aammalu isiginnaartitsisartut silarsuaanni, isiginnaartitsisartut inatsisiliuunneqarnerat nuannaarutaalluni tamatsinnut ataqatigiissitilissaaq", Sermitsiaq.agmit taama issuarneqarpoq.

Silamiut ukiuni siuliini isiginnaagassiat ataasiakkaarlugit aaqqissuuttariaqartarsimavaat, maannali tassa isiginnaartitsisartoqatigiit aalajangersumik sinaakkutalimmik inatsiseqalerneratigut toqqissisimanerulersinnaalerput.

Isiginnaartitsissusiaq "Kaassassuk 2010" sapaatip akunnerata tulliani Silamiunit isiginnaartitsissutigineqalissaaq. Isiginnaagassiaq qangarsuarli oqaluttuaatitoqarput nutaalianngorlugu takutinneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq