Isertuussaq saqqummersoq isumakulutsitsilerpoq

Nalunaarusianimi nangaarianngivillutik - oqaasissaminnik oqimaalutaallaqqinngivillutik - politikerit nuimasut nunarsuarmi tamaneersut eqqartorneqarmata.

Isertuussanik saqqummiusineq kanngunartoq danskit nunanut allanut ministeriaqarfianni aamma eqqarsalersitsisimavoq. Danskit diplomatiusimasut isumaqarput, ambassadenit nunanut allanut ministeriaqarfimmut nalunaarusiarineqartartut siunissami eqqarsaatiginerullugit allanneqartalissaasut.

Ambassadøriusimasoq Erik Fiil, ukiuni 40-ni diplomatiusimasoq, kingunerusinnaasunut ernumasut ilagaat.

- Suleqatit ilagineranni mianersornerusalissapput, aammalu nunagisamut nalunaarusiornermi mianersornerusalissallutik, toqqaannarpallaarunnaarlutik. Erik Fiil oqarpoq.

Amerikamiut nalunaarusiaanni oqaatsit nakkarsaasut amigaatigineqanngeqaat, USA-p nammineq iligisaanut aamma. Frankrigimi præsidenti Sarkozy kaasari atisaqanngitsutut eqqartorneqarpoq, Ruslandip præsidentia Putin pingaarniartutut taaneqarpoq, tyskillu nunanut allanut ministeriat Westerwelle piginnaanikitsuunerarneqarpoq qilalertuaannartuunerarneqarlunilu.

Nunat akornanni attaveqaqatigiinneq tamakkuninnga saqqummertoqarneranit ajoquserneqarsinnaavoq, taamaattumillu siunissami nalunaarusiat annikinnernik imaqartalersinnaallutik. Tamannalu alianartuuvoq, diplomatimmi siunissami nunaminnut nalunaarusiatik toqqaannarpallaaratik allattalerunikkik nunaminni ministerit paasisassaat annikinnerulisammata, Niels Egelund Parisimi ambassadøriujunnaaqqammersoq taama isumaqarpoq.

- Diplomatit nalunaarusiaat isummanik ersarissunik, naliliinernik ersarissunik, imaqanngippata taava aalajangiisussap, ministeriunerup, nunanut allanut ministerip ministerilluunniit allat nalunaarusiat taakku sumut atussagamikkit? Ersarissunik isummanik imaqanngippata atorneqarsinnaanngillat.

Frankrigimi ambassadøriusimasoq, Niels Egelund DR-imut taama oqarpoq.