Isertorlutik kilisaammut ilaasut Sisimiunukartut nassaarineqartut
Canadamiut kilisaataat Nuummiit ippassaq ualiarsalersoq aallartoq, maanna Sisimiunukalerpoq.
Allattoq Jonas Løvschall-Wedel
Kilisaammi isertorlutik ilaasut marluk nassaarineqarput, Sisimiunilu politiit angutinik inuusuttunik nakkutiginninniassallutik tikinnissaat maanna utaqqivaat.
Angutit inuusuttut marluk pillugit politiit nalunaarfigineqarsimasut tigusarinninnissaminnullu piareersimatitsillutik, Politiit attaveqaqatigiinnermut siunnersortaata uppernarsarpaa.
KNR-ip paasisai naapertorlugit angutit inuusuttut syriamiuunerarsimapput.