Isertitsivinni nakkutilliisussat soraarummerput
Nunatsinni pineqaatissinneqarsimasunut isertitsisarfinni nakkutilliisussatut ilinniartut 20-it soraarummeernertik ullumikkut naammassissavaat.
Isertitsisarfinni nakkutilliisussatut ilinniartut soraarummeernerminni isertitsisarfinni pissutsit piviusut aallaavigalugit suliakkersorneqarput.
Pineqaatissinneqarsimasunut isertitsisarfinni pissutsit piviusut assilillugit pisuusaartitsisoqarpoq, allaat pineqaatissinneqarsimasuusaartoqarluni.
Piviusunut assut assingusumik soraarummeerutigalugu suliami pisoqarsinnaavoq, allaat soorlu eqqissisaanermi nukiit atorneqarsinnaallutik, soraarummeertitsisoq, nunatsinni pineqaatissinneqarsimasunut isertitsivinni sulisunut siunnersorti, Per Kelvig, oqaluttuarpoq.
Nakkutilliisussatut soraarummeertut piviusuusaartitsinerit aallaavigalugit nalunaarusiorput ullumi illersugassaminnik.
Pineqaatissinneqarsimasunut isertitsivinni nakkutilliisussatut ilinniarneq ukiunik marlunnik sivisussuseqartarpoq, atuagarsornertaqariarluni praktikkernermik naggaserneqartarluni.
