Isarukitsut qiullutik toqorartut
Tamaani sivisuumik sialleqattaarnera tamatumunnga patsisaavoq. Ullumikkummi taqqavani nittaalarnani siallernerusalerpoq. Tuluit ilisimatuut Sikuiuitsumi Kujallermi ilisimatusartut oqaatigaat, taqqavani ulloq ataaseq sialleraangat ullut marluk nittaalartaraluartoq, ullumikkullu tamanna killormut saassimasoq, aviisimi Politikenimi allaaserinnittoqarpoq.
Isarukitsut piaraat meqqunitsinnatik issimut malussarittaqaat, meqquimi imermut illersuutaagamik. Isarukitsut piaqqiuneranniit qaammatip ataatsip marlulluunniit ingerlanerini sialliinnaleraangat masallutik qiusarput. Tamatuma kinguneranik isarukitsut ikiliartornerat takuneqarsinnaavoq.
Isarukitsut adeliemik taaneqartartut 80 procentinik ikileriarsimapput. Sikuiuitsumi Kujallermi siallertarnera taamaaginnassapput, isarukitsut Adeliet ukiut qulit ingerlanerini nungutaanissaat ilimagineqarpoq.
Taqqavani isarukitsut annersaat kejser pingvininik taaneqartartut, silap pissusaata allanngoriartorneranit aamma eqqugaapput.
Ilisimatuut 2006-imi Sikuiuitsumi Kujallermi ilisimasassarsiorlutik angalanerminni tupigusuutigisaminnik piaqqiorfigisagaanni piaqqamik ataatsimilluunniit takusaqanngillat, tassami piaqqiorfigisagaat, siornatigut sikumik qallersimasaraluartoq, imaannanngorsimammat.
