Isaksen Design Kalaallit Illutaannit Københavnimiittumit nuuppoq
Kalaallit Illutaanni pisiniarfik naqqup iluaniittoq ukiuni kingullerni taarseraaffiungaatsiartumik attartortoqartarsimavoq, Isaksen Designillu pisiniarfik ukioq ataaseq sinnilaaginnarlugu attartorsimavaa.
Nickie Isaksen naapertorlugu, pisiniarfik amigartooruteqarfiusimanngikkaluarpoq, sulisorineqartulli marluusut akissarsiassaannut naammaqqatartumik kaaviaartitaqarluni ingerlasinnaasimalluni. Isaksen Design Frederiksbergimi pisiniarfiutini ilaatigut peqqumaaviup pisiniarfimmut ilanngunneratigut allisaaffiginiarlugu toqqarsimavaa, nittartakkatigullu pisiniarfik ammaqqammersoq aamma ingerlallualersimavoq, pingaartumik Danmarkimit, Canadamit Tysklandimiillu pisiniarfigineqartarluni.
- Løvstrædemiinnerput nuannarigaluaqaarput, pitsanngorsaasariaqarpugulli. Pisiniarfiit pingasut ataatsikkut ingerlanniarnissaat siunertaqarpallaarsimanngilaq, Nickie Isaksen, kaminnik Portugalimi nioqqutissiortitsinissaminut atatillugu Portugalimiittoq KNR-imit oqaloqatigineqarluni taama oqarpoq.