Isak Davidsen: Siulittaasoqarfimmi toqqissisimanngittoqarpoq
- Siullermik oqaatigissavara ataatigut atsiortunga Inatsisartut siulittaasoqarfianni ataatsimiititaliami ilaasortaagama Inatsisartunut ilaasortat peqquserlullutik taasisarneranni pinngitsuutitsinermik aalajangernermi akisussaaqataagama. Taamaattorli inuiaqatigiinnut oqaatigiumavara suliaq suliaammat nuanniilluinnartoq illuatungiliuttullu annertuumik matooriniarfigisaat pisuussummimmi partiit Inuit Ataqatigiit aamma Demokraatit tigumminnittuugamik, Isak Davidsen oqarpoq nangipporlu: Taamaattorli aamma oqaatigiumavara Naalakkersuisuutitalinniit ilaasortaagaluarluta ilaatigut ilaqarpugut illuatungiliuttunut assut tusaaniartunik, aammalu siulittaasoqarpoq atorfilittanik aqunneqartumik, politikkikkut isummerfissani nammineersinnaanngitsumik.
- Ataatigut atsiortunga siulittaasoq Siumumeersoq ilaasortaaqatigaara, maannakkullu pisumi aalajangernermi naalakkersuisooqatigiinneersut illuatungiliuttunit ilalerneqaqisumik aalajangiinerat amerlanerussuteqartut aalajangernerat sumiluunniit atortinneqartarmat peqataaffigivara.
Siusinnerusukkut tusagassiutitigut nalunaaruteqarnikuuvunga pisup aallartiffia 15. oktobari 2008-miit Inatsisartut Siulittaasuanit Ruth Heilmannimit ulloq taanna allakkatigut apuussisoqarmat ilisimasimagaa qisuariartoqanngitsorli.
- Tamatuma kingorna Siulittaasoqarfik qaammat ataaseq qaangiutereersoq aatsaat novembarip 19-iani qisuariarpoq, tamannalu siulittaasoqarfimmi Siulittaasup kukkussutigaa akuerineqarsinnaanngitsoq.
Suna tamarmi isasoortutut immat aatsaat siulittaasoqarfik kingusinaarujussuarluni qisuariarpoq, ilami allaat oqaasiinnartigut Siulittaasumut apuussisoqarsimavoq, siulittaasullu naalakkersuisooqataasuniit Siulittaasoqarfimmi ilaasortaasoq ilisimatissimavaa ilaasortanulli allanut isertuussimallugu aamma uannut.
Assakka errortornianngilakka, unneqqarillungali oqarusuppunga Siulittaasoqarfimmi siulittaasoq taama unneqqaserlutsigitillugu aamma atorfilittanik taama aqunneqartigitillugu ajoraluartumik iluarsisoqarnavianngilaq. Ilanngullugu oqaatigissavara Siulittaasoqarfimmi ilaasortaanera Partiinnit isorineqarpat peqquneqarumalu tunuaqqullunga piareersimavunga siulittaasoqarfimmit ilaasortaaninnit tunuassallunga.
-Taamatut aalajangertoqassappat maannakkut piut Inatsisartut kanngunartuliaat Inatsisartullu siulittaasoqarfiata pinngitsuutitsinera akuerseqataaffigisimasara amerlanerussuteqartut aalajangernerimmassuk tunngavigalugu tunuassaanga. Inuiaqatigiimmi sullikkusuppakka pitsaasussap tungaanut, Siumup sullissiniarnermini Inatsisartuni Siulittaasoqarneq eqqarsaatigisariaqalerpaa, Siumut sinnerlugu Inatsisartuni ilaasortaq Isak Davidsen naggasiivoq.
