Irlandimiut eqqissivissioqatigiipput
Irland-ip Avannaata oqaluttuarisaanera nutaamik ullumi pisoqarfiussaaq, naalakkersuisooqatigiilersussat katuullit protestantillu suleqatigiilerumallutik perngaammik neriorsueqatigiittussaammata.
Upperisarsioqatigiit taakkua marluk ukiorpanngortuni imminnut aaqqiagiinngissuteqartuartarsimapput, ukiut qulit matuma siorna tallimanngornersuarmi 1998 isumaqatigiissut siulleq pereersorlu massakkut tassa kiisami neriorsoqatigiilluni isumaqatigiissusiortoqarpoq.
Inuit 108-t inatsisartunut marsip arfineq aappaanni qinigaasimasut tuluit immikkoortoqarfianeersuupput, nunallu immikkoortoqarfiani tassani naalakkersuisooqatigiinnissaminnik neriorsoqatigiittussaapput.
Angut nipitoorujussuaq isumaqatiginninniarusun-ngisaannarsimasorlu protestant-it palasiat Ian Paisley DUP-partiianneersoq, nunap immikkoortoqarfiani ministerinngussaaq kiisalu katuullit, Martin McGuinness-ertaat, Sinn Fein-imeersoq, ministerimut tullersortinngussalluni.
Ukiut tallimat matuma siorna tamanna eqqarsaatigi-neqanngisaannarsimavoq, mannakkulli Irland-ip Avannaani ullut nutaat aamma atorneqarput.
Naalakkersuisooqatigiinni nutaaneersut peqatigiinniat DUP-meersut, Irland-ip Avannaata London-ip naalakkersuisoqarfianut ministeriaqarfinnut sisamanut ataannarnissaat piumasaraa.
Sinn Fein, Irland-ip Avannaata Irland-ip sinneranut kattutsinneqarnissaa ministeriaqarfinnut pingasunut ilaatinneqarluni piumasaraa. Protestant-it partiiat UUP marlunnik ministeriaqarfitaarpoq, katuullillu partiiat SDLP ministereqarfik ataaseq pissarsiaraat.
