Irlandimi avannarlermi kannguttaatsuliorneq
Suliami imaannaanngitsumi tassani, atoqatigiittarneq, peqquserluttuliorneq aamma pissaanermik atornerluineq ilaallutillu ministeriunerup atorfeqarnera inuiaqatigiillu ingerlanneqarneranni aalajaanneq ulorianartorsiortinneqarput.
Allaanngilaq filmimi qulequtarineqartartut ilaat tusaannarlugu. Arnaq pissaaneqaqisoq 59-inik ukiulik angummik 19-inik ukiulimmik atoqateqartarsimavoq, atoqatigiittarnerlu paasineqarpoq pisorlu aallartippoq. Ilaqutariit Iris aamma Peter Robinsonikkut filmimilu Favre voksen verdenimi Robinsonikkut ateerigaluaraat assigiissutaat taannatuanngorpoq. Nuliaasoq Irlandip avannarliup inatsisartuinut ilaasortaavoq uiusorlu naalakkersuisunut ilaasortaalluni. Angummik atoqateqartarnermi saniatigut, arnap taassuma angut atoqatigisartakkami café-mik ammaanissaanut atugassaanik 50.000 pundinik tunisimavaa, aningaasat taakku arnap nalunaarsorsimanngilai inatsisitigullu unioqqutitsisumik taakku aamma pissarsiarineqarsimagunarlutik. Iris Robinson imminut toqoriaraluarpoq naalakkersuinermillu suliaqarnerminit tunuarumalluni, taamaakkaluartoq Irlandip avannarliup qullersarisaa aamma ulorianartorsiorpoq. Tassami arlaatigut aningaasanut tunngasunik ilisimasaqarsimasinnaavoq.
- Sunnguamilluunniit ilisimasaqanngilanga neriuppungalu piaarnerpaamik atera ataqqinarsiseqqinneqassasoq, Peter Robinson oqarpoq.
Tamassuma pinissaa qularnakujuppoq, atorfeqarneralu tamaanga aamma killeqarunarpoq. Irlandimi avannarlermi pissuserissaarnissap pingaartinneqarnera suli atuuppoq pisorlu assut assuarineqarpoq.
Peter Robinsonillu, Irlandimi avannarlermi inatsisartut siulittaasuata Democratic Unionist Partymilu siulittaasup tuniarnissaa sapaatip akunnera kingullerli tapersersorneqaraluttuinnarsimavoq.
Pisoq pillugu ilisimasaqarsimassaaq taamaammallu tunuartariaqarpoq, arnaq utoqqasaaq Belfastimeersoq ullumi oqarpoq.
Naalakkersuinikkullu suliallit aamma akerliunerat alliartorpoq. Ataqqinassusia kiisalu partiimut siuttutut ingerlaannarsinnaanera peerupput. Tunuarnissaanut ullut kisimik apeqqutaaginnarput, taama oqarpoq ministeritut siullertut atuussimasoq David Trimple.
Peter Robinson ingerlaannartumik sapaatip akunnernini arfinilinni sulinngiffeqalerpoq. Tunuarneratigut nukiit ingasattajaarnerusut aqqutissiuunneqalissasut eqqissinissamillu ingerlatsineq qajannartoq aserorneqarsinnaasoq amerlasuunit ersissutigineqarpoq.
