Irlandimi akerariitoqqat naalakkersuisooqatigiilersut

Irland Avannarleq kiisami ukiut arfineq pingasut ingerlareersullu nutaanik naalakkersuisortaalerpoq.

Naalakkersuisullu kiisami akerariitoqqat naagaartut palasiat, Ian Paisley, DUP partiimeersoq, nunap immikkoortuani ministerinngoqqaartuussaaq kiisalu katuuleq, Martin McGuinness, Sinn Fein-imeersoq tullersortitut ministeriulissaaq.

Martin McGuiness katuuliusup, oqaatigaa, ataatsimiin-nertik aallartittoq, massakkullu Irland Avannarleq ilorraap tungaanut aamma ingerlalersoq. Naaggaartut palasiat; Ian Paisley-ip peqatigalugu ataatsimiinnertik ingerlakkitsik. Irland Avannarlermut tunngatillugu Tuluit ministeriat; Peter Hain-ip paasissutissiissutigaa, inuit taakku marluk maannamut arlaleriarluni ataatsimeeqatigereerini, ukiorpassuarnilu inuit taakku marluk imminnut aaqqiagiinngissuteqartareerlutik taamatut suleqatigiilernerat isumalluarnartoq. Siornatigullu suleqatigiilinngisaannarniarlutik imminnut oqarfigisarsimagaluarlutik, ullumikkut suleqatigiilinngikkunik Irland Avannarleq namminersulivissinnaassanngittoq paasileramikku allatut ajornartunik suleqatigiilertariaqarsimapput. Suleqatigiilersinnaassanngikkunillu, kingumut Tuluit Nunaannit London-imiit aqunneqaannartariaqassapput.

Ilimagineqarpoq Tony Blair siunissami aggersumi, premierministeriunerminit tunuassasoq. Suna tamarmi iluatsissappat Irland Avannarlermi politikikkut taamatut ineriartortoqalernera Tony Blair-ip eqqaamaneqaatigilertussaavaa. Irland Avannarlermi ukiuni kingullerni 30-ni aporaattarnerit inuit 3000-it inuunerannik akeqarsimavoq.