Iranip præsidentia Libanonimut tikeraarniarpoq

Israeli Libanonimilu politikerit arlallit tikeraarnissaq pisariaqartinngikkaluarpaat.

Soorlu nunasiaatilik nunaatiminik alakkaasoq. Taama naatsigisumik politikerit Israelimiut præsident Ahmadinejadip tikeraarnissaa nassuiarpaat.

Tikeraarnermi Libanonip præsidentia ministeriuneralu ataatsimeeqatigineqassapput, Libanonillu kujataani Ahmadinejad ujaqqamik Israelimut miloriussissasoq New York Times allappoq. Iranillu præsidentiata Hizbollah-p siuttua naapissavaa. Iranip Hizbollah-mut attaveqarnera akerleriiffiuvoq.

Israelimi tusagassaqartitsiviit aallaavigalugit Israeli qaammatini kingullerni Naalagaaffiit Peqatigiit aqqutigalugit Libanon pinngitsaalillugu tikeraarnissaa taamaatitsiteriaraluarpaat.

Sapaatip akunnerata ingerlanerani USA-p nunanut allanut ministeriata Hillary Clintonip oqaaseqartartuata oqaatigaa Clintonip Libanonip præsidentianut oqaloqatiginninnermini tikeraarnissaq ernumanartoqarnerarsimagaa.

Libanonimi politikikkut ingerlatsineq pissanganartorsiornarpoq, politikerit misissueqqissaartartullu naalagaaffiup inuisa imminnut sorsunnerannik kinguneqarsinnaasoq mianersoqqussutigaat. Tassunga tunngaviuvoq siunissami qaninnermi kina ministeriunermut toqutsisimasutut pasineqarnersoq nalunaarutigineqassammat, tusakkallu tamarmik oqaatigaat Hizbollahmi ilaasortaq pasisaassasoq. Hizbollahllu oqaatigereerpaa taama pisoqassappat eqqartuussisoqarnissaanut tunniussiniaratik. Qanorluunniit sorsunnermik kinguneqassagaluarpat.

Hizbollap akeraasa Ahmadinejadip tikeraarnissaa kamassaarinertut isigaat naalagaaffiup inuisa imminnut sorsulersinnaanerat pillugu.

Libanonimilu politikerit ilaasa tikeraarnissaq pissaanermik takutitsinertut oqaatigaat.

Hizbollah Iranilu assigiinngitsutigut suleqatigiipput, Hizbollah aningaasanik sakkussanillu Iranimit pisarpoq.