Iranip peqqinnissamut ministeriata tullersortaa coronavirusimik tunillatsissimasoq
Irani peqqqinnissamut ministeriata tullersortaa coronavirusimik tunillatsissimavoq. Inuttaata nammineq tamanna ilisimatitsissutigigaa, videomik immiussami, Iranimi naalagaaffiup TV-qarfianut nasssiunneqarsimasumi, takuneqarsinnaavoq.
Iranip peqqinnissamut ministeriata tullersortaa, Iraj Harirchi, maanna mattussaaqqasoq, Iranip peqqinnissamut ministereqarfiata oqaaseqartartuisa ilaata ilanngullugu oqaatigaa.
- Iraj Harirchi, coronavirusip tuniluunnerunissaanik akiuiniarnermi siulersuisuusoq, coronaviruseqarneranik misissorneqarmat tunillatsissimasoq paasineqarpoq. Oqaaseqartartoq Twitterikkut taama allappoq.
Harirchip nunaqqatini ulluni kingullerni eqqissisarniarsaralugillu ilisimateqattaarpai, nualluut taanna Iranimi oqartussaasunit iliuuseqarfigineqartoq.
Tunillatsissimasorineqartut 900-ngajaat misissortissasut
Inuttaa tusagassiortunik ippassaq ataasinngornermi katersortitsinermi najuunnermini quersorulullunilu kissaruluppasippoq.
Nualluummik coronavirusimik Iranimi inuit toqquteqartut katillugit 16-iupput, Iranilu taamaalilluni Kina tulleralugu nualluummik taassuminnga toqquteqarfiunerpaavoq.
Coronavirusimik Iranimi tunillatsissimasut 34-nik amerlisimasut, Iranip marlunngornermi nalunaarutigaa. Tunillatsissimasut affangajaat illoqarfimmi illernartumi Qomimi inuttaasuupput.
Iranimi tunillatsissimasutut nalunaarsorsimasut katillugit 95-iupput. Iranimi tunillatsissimasorineqartut 900 missaanniittut misissortissasut, Iranimi oqartussaasut oqaatigaat.
Iranimi illoqarfik Qom coronavirusimik tuniluuffiusutut isigineqaraluartoq illoqarfik manna tikillugu matuneqarallanngilaq.
