Iranip nunanut allanut ministeriata USA allanut attaveqarnermut killuutiginnittutut pasilleraa
"Allanut attaveqarnermut matu” ammajuaannaavittariaqaraluarpoq, maannali taamaanngilaq, Iranip nunanut allanut ministeria Abbas Araghchi, Istanbulimi tusagassiortunut sassarnermini oqarpoq.
Taamak tusagassiorfik Al Jazeera sapaammi allappoq.
USA Atomip nukinganik nukissiorfinnut pingasunut qallunaat nalunaaqutaat malillugu sapaammut unnuaani saassussivoq.
Israelip Iranillu akorniminni akerleriinnerini aatsaavissuaq USA toqqaannartumik ilannguppoq.
Iranimiut atomip nukinganik atuisinnaanerat pillugu Irani USA-lu qaammatialunni isumaqatiginninniutigaat, Iranilu naapertorlugu eqqissisimasumik siunertaqarput, nunalli arlallit tamanna qularutigilluinnarpaat.
Araghchip USA allanut attaveqarnermut “killuutignnittutut” pasillerpaa.
- Allanut attaveqarnermut matu ammajuaannaavittariaqaraluarpoq, maannali taamaanngilaq, Araghchi oqarpoq.
- Nunaga saassunneqarpoq, inatsisitigullu akuerisaasoq immitsinnut illersornissamut pisinnaatitaaffipput tunngavigalugu akisariaqarpugut.
Sioorasaarineq
Nangipporlu, ualimut Moskvaliassalluni Russit præsidentiat Vladimir Putin ataasinngorpat ataatsimeeqatigissagamiuk. Tassani taakku marluullutik “pingaarutilinnik” oqallisigisaqassallutik.
Nunat taakku marluk suleqatigiipput
Ilaatigut EU Tuluit Nunaallu qaffasissumik aaqqiissuteqartoqarnissaanik kajumissaarinerisa kingorna, Iranimiut nunanut allanut ministeriata allamut attaveqarneq pillugu oqaaseqaateqarpoq.
- USA-p naalagaaffiit innuttanut pisussaaffiinnut ataqqinnissuseqarnatik takutippaat. Pissaaneqarneq sioorasaarinerlu taamaallaat ilisimavaat, nutaarsiassaqartitsivik Reuters naapertorlugu Araghchi oqarpoq.
USA Israelillu allanut attaveqarnermut ilungersuutit saassussinermikkut “qaartereeraat”, taanna inoqatinut attaveqaqatigiittarfikkut X-ikkut siornatigut allannikuuvoq.
Irani akiniaaqqunagu Amerikamiut præsidentiat Donald Trumpi sioorasaarivoq.
USA-p kissaatigippagu Iranimi arlalinnik saassusseqqissinnaasoq taanna oqarpoq.
/ritzau/
