Iranip inatsisartuinut qineqqusaarniartorpassuit qinersinermut ilaatinneqanngitsut
Iranimi qinersisartut inatsisartunut, 290-inik ilaasortaqartartunut, ullumi (tallimanngornermi) qinersissapput.
Qineqqusaarniartulli amerlasuut qineqqusaarnissamut itigartinneqareerput, qinersinerlu Iranip nunanut allanut politikkianut Iranip aqutsisuinit taakkualu siuttuannit ayatolla Ali Khameneimit aalajangerneqartartumut sunniuteqarujussuassangatinneqanngilaq.
Taamaalilluni qinersineq Iranip USA-mut atassuteqarneranut allannguinavianngitsoq, USA-p Iranimi sinniisua Brian Hook isumaqarpoq.
Aqutsisunut akerliusut qinersiartunnginnissamut kajumissaarisut
Ali Khameniep qinersinissaq upperisamut atatillugu pisussaanerusutut taavaa, amerlasoorpassuillu qinersiartornissaat nunap aqutsisuisa piumasarivaat. Aqutsisunulli akerliusut qiniarsiartunnginnissamut kajumissaaripput.
Iranip præsidentianut ingasattajaartuunngitsumut, Hassan Rouhanimut, tapersersuisut quliugaangata qulingiluat qineqqusaarnissamut itigartinneqarnerat qinersiartoqqusinnginnermut pissutaavoq. Inatsisartunullu maanna ilaasortat pingasorarterutaat qineqqusaaqqinnissamut itigartinneqarput.
Illuatungiliuttut qinersineq tamat oqartussaaqataanerannik tunngaveqannginneraraat
Taamaalilluni qinersineq tamat oqartussaaqataanerannik tunngaveqanngitsoq, illuatungiliuttut isumaqarput.
- Inatsisartunut ilaasortani immikkoortortaq kisiat pineqarpat, qinersinertut taaneqarsinnaanngilaq, Washingtonimi Arab Gulf States Institutimi ilisimatooq, Ali Alfoneh oqarpoq.
Ayatollap Khameneip inatsisartut katitigaanerat præsident Rouhanimut akerliusunngortillugu allanngortikkusuppaa, ilisimatooq oqarpoq.