Iranip atomimik sakkuliornissaa kingumut annilaangassutaalerpoq
Iran atomiliornissamut pilersaarusiornissamut nammineersinnaanngorpoq, taamaalillunilu imminut pilersorsinnaanngorluni. Iranimi atomit pillugit pisortaq ippassaq taama ilisimatitsivoq. Atomiliornissaq pillugu pilersaarusiaq pillugu inuiaqatigiinnik arfinilinnik iranimiut ullumi oqaloqatiginnissapput, atomiliornissamullu pilersaarusiorniarnerat Amerikap kippasissuani innuttaasunit ernummatigineqarpoq, tassami qaartartuliortoqarnissaa annilaanngatigigamikku. Nutaarsiassaqartitsivimmi Ritzauimi tamanna allaaserineqarpoq.
Yellowcake-imik taaneqartartoq, tassa uranimut imerpallarlugu akuutissaq, atomimik sakkulianut atorneqarsinnaasoq, Iranip nammineq sanasimagunarpaa. Taamaalilluni Iranip nunanit allaniit eqqussisarneq pisariaqartikkunnaarpaa.
- Iranip pilersaarutai, taavalu isumanerluutit, tamatumani apeqquserneqartariaqalissapput, tassami nunarsuaq tamakkerlugu inuiaqatigiit ernummataat Iranip eqqarsaatigisussaammagit, præsidentip Illorsuanit avammut oqaaseqartartoq, Mike Hammer, nutaarsiassaqartitsivimmut AFP-mut oqarpoq.
Atomimik sakkussianut paasisimasaqarluartoq, Dave Albright, TV-qarfissuarmut CNN-imut oqarpoq, uranimut imerpallarlugu akuutissaq atomimik sakkussianik sananissamut pilersaarummi isertortumik atorneqarsinnaassasoq.
Iranimit oqaatigineqartarpoq, atomi pillugu pilersaarut nukimmik pilersitsinissamut taamaallaat atorneqassasoq, Amerikalli kippasissuani innuttaasut Iran pasivaat atomip nukinganik sakkussialiorniarluni pilersaarusiortoq.
Iranimi præsidentip Ahmadinejadip arlaleriarluni erseqqissaatigisarpaa, Iranip uranimik pisuunnguallannissamut pisinnaatitaanera isumaqatigiinniutigineqanngitsoq, taamaammat Iranip USA-mik, Ruslandimik, Kinamik, Frankrigimik, Tuluit Nunaannik Tysklandimillu ullumikkut oqaloqateqarnissaa neriuutigivallaartariaqanngitsoq.
