Iranimiut tigusaapput

Præsidentissamik qinersinerup kingorna akerliussutsimik takutitsinerujussuarnik aallartitsisutut taakkua pisuutinneqarput.

Tuluit naalakkersuisusa taamaaliorneq uumisaarinertut taavaat ingelaannarlu iperaqqullugit.

- Iraniumiunik sulisutsinik suleruluttunik tigusarineqarnerat Tuluit Nunaata isumakuluutigeqaa. Tuluit nunanut allanut tungasunut ministeriat, David Miliband, tusagassiortunik katersortitsilluni ulumi taama oqarpoq.

Taanna Iranip naalakkersuisuinut pisortatigoortumik naammagittalioreerpoq, sulisumillu piaartumik iperagaanissaat piumasaralugu.

- Iranip killissani qaangerlugu uumisarivoq, Miliband oqarpoq.

Iranimi pisortat naapertorlugit, akerliussutsimik takutitsinerujussuarnut, præsidentissamilli qinersinermi aqqusinernik ulikkaarinnittartunut, tuluit aallartitaqarfiat aallartitsisuuvoq. Kisianni tuluit nunanut allanut tunngasunut ministeriata taama oqarneq ilumuunnginerarpaa ingasappallaarnerarlugu.

Iranimi ajornartorsiutinut nunat killiit pisuutinniaraluaraanni ajornartorsiutit tammarunnanngillat. Kisianni qinersinerup kingorna taasisunik kisitseqqinnissamik suli oqallittoqarpoq. Naalagaaffimmi oqartussaanerpaat, Vogternes Rådit, ullumi siunnersuutigaat, nunap immikkoortuini aalajangersimasuni qinersiviit 10 procentii kiseqqinneqassasut, tamannalu illuatungiliuttut sinniisaannik nakkutigineqarsinnaasoq.

Kisianni qinersinermi ajorsartoq Moussavi oqarpoq, taamaliorneq iluaqutaanaviangitsoq, qinerseqqinnerlu kisimi atorsinnaasoq.

Tuluit Teheranimi aallartitaqarfianni sulisut Iranimi naalakkersuisunit erniinnaq iperangaanngippata, EU-p nunanut allanut tiunngasunut ministerii ataatsimoorlutik sakkortuumik iliuuseqarniarlutik siorasaaripput.