Iranimiut raketinik igeriuttakkanik igeriussisut

Israeli, Kangianilu qiterlermi Amerikamiut sakkutooqarfii raketsit ilaannit anguneqarsinnaasimassagaluartut ilimagineqarpoq.

Iranimiut taamaalillutik atomip nukinga atorlugu nukissiorfimminnut saassussisoqarnissaa aarlerigalugu takutiinnanngilaat aammali saassunneqassagaluarunik akisinnaallutik takutippaat.

Danmarks Radiomiit USA-mi naalakkersuisut præsidentinngorniuttullu isumasiorneqarput.

USA-mi naalakkersuisut Irani sakkortuumik assuaraat, sakkutuulli naalagaat nalunaarput Amerikamiut Iranimut saassussigaluarunik Amerikamiunut kinguneqapilussinnaasoq. Israelimiulli ernumasussanngorput.

USA-mi præsidentinngorniuttussat assigiinngitsumik qisuariarput. John McCain oqarpoq maannakkut pisup takutiinnaraa Europami raketsinut igeriuttakkanut illersuusiorniarneq qanoq pingaaruteqartigisoq, nunallu tamat ikioqatigiillutik Iranimik tatisimanninniarnissaat pisariaqarluinnartoq, kiisalu Iranimiut isumaqatiginiarneqarsinnaannginnerarlugit.

Barack Obamali isumaqarpoq Amerikamiut Iranimik isumaqatiginninniartariaqartut, nunalli tamat suleqatigiillutik Irani pillarniarlugu iliuuseqartariaqartut. Obama præsidentinngoreersimasuuguni maannakkut oqaatsini eqquutsillugit isumaqatiginninniassagaluartoq ilimagineqarpoq, soorunami Iranip qanoq tatisimaneqartuarnissaa aamma Europamiut peqatigalugit maleruagassiuutissagaluarlugu.