Iranimiut qaammataasamik aallartitsipput

Teheranimit nalunaarummi oqaatigineqarpoq, qaammataasaq eqqissinissamik siunertaqarluni aallartinneqartoq, tassami atserneqarsimavoq Omid – isumaqartoq “Neriuut” - tassaallunilu qaammataasaq ilisimatusarnermi aamma attaveqaqatigiinnermi atorneqartussaq.

Iranip qaammataasamik aallartitsinermigut, atomip nukinga atorlugu nukissiuutiliorniarnerminut atatillugu naalagaaffiit allat pillaatiginiagaannit susinnaajunnaarsitaasimannginnini ersersinniarsaraa. Tassami Iranip qaartartunik atomitortunik igeriuttakkanik ineriartortitsinerata unitsinneqarnissaa siunertaralugu naalagaaffiit assigiinngitsut pillaaniarlutik iliuuseqareermata.

Iranimi fjernsynip ilisimatitsissutigaa qaammataasaq Omid qaartartumit igeriuttakkamit Safir 2-mit avataarsuanut aallartinneqartoq. Qaartartut igeriuttakkat taamaattut sorsunnermi atorneqartarnerarlugit nunat killiit alaatsinaattuisa uparuarpaat, Iranimili nunanut allanut ministerip sorsunneq siunertarineqanngitsoq oqaatigaa.

- Iranimi qaammataasanik ineriartortitsineq eqqissinissamik taamaallaat siunertaqarpoq, naalagaaffiullu pisariaqartitaanut taamaallaat atorneqassalluni, nunanut allanut ministeri oqarpoq.

Iranip qaammataasamik aallartitsinera USA-p illersornissamut ministeeriaqarfianit ernumanartoqartinneqarpoq.