Iranimi qinigaanngitsoortut avoqqaarinnipput
Iranimi qinersinerup ingerlanneqarneranik avoqqaarinnittup aappaa tassa præsidentimut qinersinermi ajorsartutut pisortatigut nalunaarutigineqartoq, Mir Hussein Mushavi. Malittarisassat naapertorlugit maanna Nakkutiginnittut siunnersuisartuisa avoqqaarinnissutit ullut qulit ingerlaneranni akisussaavaat, tallimanngormallu qinersinerup ingerlanneqarnera, nammineq isumarti naapertorlugu, pissusissamisut ingerlanneqarsimanersoq aamma naliliiffigissallugu. Qinersinerulli pissusissamisut ingerlasimanera ajugaasutut suaarutigineqartup qularinnginnerarpaa;
- Irani innuttaasut aqutaraat, inuillu kiffaanngissuseqarlutik qinersinissaminnut periarfissinneqartarput, ajugaanerarneqartoq, Mahmoud Ahmedinejad tapersersorterpassuarminut ippassaq oqalugiarluni oqarpoq.
Illuatugniliuttoq, Mir Mushavi ullumi akerliussutsimik takutitsinerujussuarmik aaqqissuigaluartoq nittartakkamigut nalunaarpoq, ingerlaarnissaq pisortat akueriumanngimmassuk kinguartittariaqartoq. Pisortaniillumi nalunaarutigineqarpoq, katersuunnerit akerliussutsimillu takutitsilluni ingerlaaqatigiinnerit tamarmik inatsisinik unioqqutitsinertut isigineqassasut. Illuatungiliuttut malersorneqartut tusagassiuutitigut tusatsiarneqartalerput, New York Timesimilu allaaserisaq naapertorlugu, illuatungiliuttut hunnorujut missaaniittut paarnaarunneqarsimapput.
