Iranimi naalakkersuisuulersut FN-imik uparuaapput

Iranimi qinersinerup inerneri ataqqinngivillugit Ban Ki Moon akuliuppoq, Iranimi naalakkersuisuutitaqalersut uparuaapput.

FN-ip generalsekretæriata Ban Ki Moonip Iranimi naalakkersuisunngortut sakkortusaaqqunagit uparuaqqammerpai.

Iranimi naalakkersuisunngortitsisut akerliuffigalugit innuttaasut sapaatip-akunnerata naanerani akerliussutsiminnik takutitserrapput, tassanilu ikinnerpaamik inuit qulit toqutaapput, immaqalu amerlanerusinnaallutik.

Ban Ki Moonip pisut assuarai, oqarluni innuttaasut pisinnaatitaaffii, soorlu killilersorneqarani oqarsinnaatitaaneq aamma naalakkersuisunit aqunneqarani ataatsimoorsinnaatitaaneq ataqqineqanngitsut. Ilinniarnertuut ilaata Ban Ki Moon isumaqatigaa, oqarluni Iranimi naalakkersuisunngortut pissaanermik peqquserlullutik tiguaanerat nunarsuarmioqatigiit iliuuseqarfigisariaqaraat.

- Naalakkersuisunngortut Iranimi amerlanerussuteqartut qinigarinngilaat. Unioqqutitsisoqarpoq, taamaammat akuerissanngilarsi, Muhammed, pineqarnissani annilaanngatigalugu naggatiminik taaseqqusinngitsoq CNN-imut oqarpoq.

- Nunarsuarmioqatit, naalakkersuisut akerlilersorlugit Iranimik niueqateqarneq eqqorniarniarsiuk, killilersuilerlusilu, Muhammed inatsivoq.

Iranimili nutaarsiassat allarluinnarmik takutitsipput. Tassami TV-kkut takutinneqarput Iranimiut akerliussutsimik takutitseqataasut, akerlioqqullugit nunani allani TV-qarfinnit peqquneqarsimanerartut.

- Nutaarsiassaqartitsivissuit Tuluit Nunaannit BBC aamma USA-mit Voice of America sullippagut, akerliussutsimik takutitseqataasut oqarput.

Iranimi tuluit aallartitaqarfiata silataani maanna Iranimiut ikinnerpaamik 100-t, aallartitaqarfik matuneqassasoq piumasaralugu katersuuttut Nutaarsiassaqartitsivik Reuters nalunaarpoq.