Iranimi akerliussutsimik takutitsisoqarnerani meeqqat 47-t toqutaapput

Iranimi ulluni makkunani akerliussutsimik takutitsisoqarnerani Iranimiut sakkutuuinit inuit sakkutuujunngitsut 378-t toqunneqarput, taakkunannga meeqqat 47-t toqunneqarlutik.

Taama nalunaarput inuit pisinnaatitaaffii pillugit sorsuuteqartuusut Iran Human Rights.

Iranimi akerliussutsimik takutitsinersuaq septembarilli qaammataanni aallartippoq,

Aatsaallu taamak sakkortutigisumik akerliussutsimik Iranimi takutitsisoqarpoq tassa Upperisarsiorneq tunaartaralugu politikkimik aqutseriaatsimut tunngatillugu.

Akerliussutsimillu takutitsineq aallaaveqarpoq arnap 22-nik ukiullip nasartaateqarsimannginnera pillugu toqutaanerata kingorna.

Akerliusut Iranimi sakkutuut sakkortunaarpaat, inuimmi 123-t Iranimi illoqarfiit ilaanni Sistan-Baluchistanimi Pakistanimut ungasinngitsumiittumi toqutaapput.

Iran Human Rightsip Norgemi immikkoortortaa naapertorlugu, Iranimiut sakkutuui "sallumik imalimmik paasititsiniaallutik siaruarteripput".

Assersuutigalugu soorlu akerliussutsimut peqataasut toqutaasimagaangata oqartarsimapput, Islaminit aamma Daeshinik taaneqartartunit toqutaasimasut.

Amiry-Moghaddam, Iran Human Rightsimi pisortaasoq taama oqarsimanerarneqarpoq.

- Akerliussutsimut peqataasut toqukkaangamikkit qunutitsisartoqatigiinnit Daeshimit toqutaanerartarpaat, Amiry-Moghaddam oqarpoq.

- Amerlanerusunik aallaarsarinninnissaminnut taamatut patsisissarsiortarput. Tamannalu FN-p inuit pisinnaatitaaffiisa siunnersuisoqatigiivinut anngunneqarpoq, taakkumi novembarip 24-iani arlaannaannulluunniit attuumassuteqanngitsumik misissuisitsiniarput, taanna oqarpoq.

Taamatuttaaq Danmarkimi Rådhuspladsimi Københavnimiittumi iranimiut politikkiat 1979-mili palasinit aqunneqalersoq akerleralugu akerliussutsimik takutitsisoqassaaq.