Iran: Uraniutersi pisariaqartinngilarput
Siumut sinnerlugu Folketingimut ilaasortap Doris Jakobsenip Iranip Danmarkimi aallartitaa Hamid Bayat ataatsimeeqatigeqqammerpaa. Urani pillugu toqqaannartumik aperineqarami, qujungulluni akivoq Irani uranimik imminut pilersoreersoq.
Allattoq Peter Troelsen, Simon Uldum
Ataatsimeeqatigiinneq Iranip aalisarneq pillugu Kalaallit Nunaannik suleqateqarnissamik soqutiginninneranik peqquteqarpoq. Aammattaaq niuerneq, ilisimatusarneq teknikkikkullu ineriartortitsineq eqqartorneqarput. Atomip nukinganik suliaqarnerup kingunerisaanik Iranimut killilersuinerit qasukkartinneqarnissaannik naatsorsuuteqarnermut atatillugu tamakku suleqatigiissutigissallugit soqutigineqarput.
Killilersuinerillu naatsorsuutigineqartutut sakkukillineqassappata Iran siunissami nunap avataanut aningaasaliisinnaalissaaq, aningaasallu taakku ilaat Kalaallit Nunaanni atorneqarsinnaanissaat periarfissaqarluarpoq.