Iran atomip nukinganik atuiniarpoq

Aggustip ulluisa 31-ianni Iranip atomip nukinganik atuiniarnini unitsissimanngikkuniuk naalagaaffimmut pillaatitut iliuuseqarfigineqassasoq, Nalagaaffiit Peqatigiit isumannaallisaaniaqatigiivini aalajangerneqarpoq.

Iranip uranimik atorsinnaanngorsaanermik unitsitsiniannginnera, Nunat tamalaat atomip nukinganik nakkutilliisoqarfiannit, IAEA-mit, ernummatigineqarpoq.

Aalajangersagaq 1696 Naalagaaffiit Peqatigiit isumannaallisaaniaqatigiivini taasissutigineqarmat 14-it akuersipput, ataaserlu, Qatar-i, akerliulluni.

Aalajangersagaq Iranip aallartitaanit inatsisinik tunngavissaqanngitsutut nalilerneqarpoq.

- Iran eqqissisimanartumik atomip nukinganik atuiniarpoq, taamaammat Naalagaaffiit Peqatigiit isumannaallisaaniaqatigiivisa aalajangersagaat inatsisitigut tunngavissaqanngilaq, Iranip aallartitaa Javad Zarif, ataatsimeereernerup kingorna oqarpoq.

Akerlianik USA-p aallartitaa John Bolton aalajangersakkap akuersissutigineqarnera qiimmattaatigaa:

- Iranip atomimik sakkussiarsualiorniarnera unitsinniarlugu aalajangersakkat siullersaraat. Tamanna Naalagaaffiit Peqatigiit isumannaallisaaniaqatigiivisa piumasaraat, John Bolton, isumannaallisaaniaqatigiit ataatsimeereersullu oqarpoq.