Irakimi uillarnerit milliuunit sinneqarput
Irakimi biilinik qaartitsisoqaraangat, imminut toqoriaatigaluni qaartitsisoqaraangat aqquserngilluunniit saniani qaartitsisoqaraangat, uillarnerit amerliallaannaratik aamma ilaqutariit pilersuisueruttut amerlisarput, kiisalu arnat ilaqutariillu qatanngutiminnit, ernerminnit ataataminnilluunniit pilersorneqartut eqqorneqartarput. Tusagassiuisarfimmi Reutersimi allaaserisat naapertorlugit, nunami arnat pisinnaatitaaffii taama suunngitsigimmata arnat qinusartutut atortittartutulluunniit inuusariaqalersarput, inuussutissaqarusullutik meeqqamillu atuarnissaat akilersinnaaniarlugit. Qanga ileqqut naapertorlugit inuusut arnartaat angerlarsimaannartariaqartarput inuuniapiloornertik qimanniarlugu namminneq qanoq iliuuseqarsinnaanatik. Irakimi qassinik uillarneqarnersoq ilisimaneqanngikkaluartoq, 1980-ikkunni -90-ikkunnilu sorsuttoqartarsimanera kingunipiloqartoq takuneqarsinnaavoq. 1980-imiit -88-ip tungaanut Iranimut sorsunnerup 1991-imilu sorsunnerup kinguaariit utoqqaanerusut eqqorsimavai, 2003-miilli USA-p tiguaanialernerata kingorna angutit inuusunnerusut eqqornerugai. Irakimi arnanut atugassarititaasut pillugit naalakkersuisoq, Namin Odman, nalunaarpoq Irakimi arnat inersimasut 8,5 milliuunit akornanni 2 milliuunit uillarnerunissaat ilimagalugu, arnallu taakku akornanni 84.000-iinnaat naalakkersuisuniit ikiorserneqartarput. Inunnillu isumaginninneq taama annikitsigitillugu inuiaqatigiit qanoq iliuuseqarsinnaajunnaarnerannik kinguneqarsinnaasoq, naalakkersuisoq oqarpoq.
