Irakimi toqoraalluni sorsuuttoqartuarsinnarpoq
Irakimi illoqarfiit pingaarnersaanni Bagdadimi illoqarfinnilu nunaannarmiittuni toqoraalluni sorsuuttoqartuarsinnarpoq. Aamma Amerikami Washingtonimi oqaatsit atorlugit sorsuuttoqarpoq.
Irakimi illoqarfiit pingaarnersaanni aamma Syriamut killeqarfiup eqqaani ullut tamaasa toqusoqartarpoq – taamaattorli Amerikami naalakkersuisut illoqarfianni politikerit Irakimi pisut qanoq taaneqassanersut suli assortuussutigaat.
Præsident Buship ippassaq siullermeerluni nassuerutigaa USA Irakimi sorsunnermi ajugaalinnginnerarlugu. Aamma ajorsartoqalernerarlugu oqanngilaq, soorlu nunanut allanut ministeriusimasup Colin Powellip tamanna oqaatigigaluaraa.
Nunanut allanut ministerertaap Robert Gates-ip oqaasia Buship inatsisartuni tusarniaasoqarnerani oqaatigeqqiinnarpaa, tassa ajugaasoqalinnginnerarlugu.
Præsidentip illorsuani Det hvide husimi pissutsit ilisimaneqarput, tassa ajugaalinngilagut aamma ajorsartitaalinngilagut.
Aviisimi Washington Postimi apersorneqarluni Bush oqarpoq, sakkutuunik amerlanerusunik Irakimukartitsiniarluni.
Matumani siunnersortimi sakkutuujunngitsut siunnersuutaat malillugu Amerikamiut sakkutuui Irakimiittut 140.000-iusut amerlerusuppai, siunnersortaali sakkutuuni qullersaasut sakkutuut amerlanerusut Irakiliartinnissaasa iluaqutaanissaa qularutigaat. Kangiani Qiterlermi Amerikamiut sakkutuuisa pisortaat isumaqarpoq sakkutuut Irakimiittut amerlinerisigut Irakimi Amerikamiunut akerlilersuineq sakkortusarneqaannassasoq.
