Irakimi sorsunneq soqutigineerukkiartuinnarpoq
Qitiusumik ilisimatusarnermik ingerlatsivik, arlaannaannulluunniit attuumassuteqanngitsoq, PEW misissuereerluni taama nalunaaruteqarpoq.
Irakimi sorsuunneq 2007-imi nutaarsiassaqartitsiviit nutaarsiassaataasa 15 procentiannit sammineqarpoq. Ukiormanna qaammatini siullerni pingasuni sorsunneq 4 procentiinnarmik nutaarsiassani sammineqartoq, PEW-p nalunaarsuinera ersersitsivoq.
Assersuutigalugu Amerikamiut sisamararterutaasa kisimik ilisimavaat, Amerikamiut sakkutuui Irakimi toqutaasut 4.000-ingajaasut. Toqutaasullu amerlassusaasa ippassaq 4.000-it anguaat.
Tamatumunnga sanilliullugu Amerikamiut pingajorarterutaasa, kisitsisit kingulliit Amerikamiut aningaasarsiornikkut niueqatigiittarfianneersut ilisimasaqarfigaat. Tassa Amerikamiut aningaasarsiornikkut ingerlanerliornerat præsidentissarsiorlunilu qinigassanngortinniunneq, Amerikami tusagassiorfiit, Irakimi sorsuunnermit pingaartinnerugaat nutaarsiassaqartitsivinnik misissuinerup ersersippaa.