Irakimi sakkutuuliussat angerlalerunarput
Irakimiut sakkutuuisa 16-it nunap immikkoortuini 18-iusuni namminneq isumannaallisaaffigisinnaammatigik nunat allamiut sakkutuui angerlakaasinnaalerput, Irakimi naalakkersuisut siulittaasortaavat taama nalunaarpoq.
USA-p aamma Tuluit Nunaata sakkutuui ilimagisamit sukkanerusumik angerlartinneqartussanngoriasaartut, tuluit aviisiat The Guardian allappoq.
Irakimi naalakkersuisut siulittaasuat isumalluartorujussuulluni nalunaaruteqarpoq, USA-p tuluillu sakkutuui Irakimit ukioq mannamiit angerlakaasinnaasut. Illoqarfiit pingaanersaanni Bagdadimi, Irakillu kitaatungaani eqqissiviilliorfiusumi, USA-p tuluillu sakkutuuisa isumannaallisaanissaat kissaatigineqartoq, Irakimi naalakkersuisut siulittaasuata ilanngullugu nalunaarutigaa.
Taama nalunaaruteqarneq upperineqassappat, sakkutuut maannangaaq angerlarsinnaapput. USA-mi Tuluit Nunaannilu naalakkersuisut taamatorpiaq eqqarsaateqartut, tuluit aviisiat, The Guardian, ullumi allappoq.
George Buship Tony Blairillu Washingtonimi sisamanngorpat tallimanngorpallu tamanna eqqartussagaat aviisi aamma allappoq.
Irakimi naalakkersuisut isumannaallisaaqataassasut George Buship ippassaq erseqqissarpaa.
Irakimi nunap immikkoortui sisamat tuluit sakkutuuisa isumannaallisaavigaat. Taakku affai juunimi juulimiluunniit Irakimiunit isumannaallisaavigineqalissapput. Basramili eqqissiviilliornerit sakkortuallaaqimmata tamaani suli isumaallisaasoqassaaq. Tappavani naalakkersuisut isumannaallisaaneq nalilersorniarlugu nakkutilliisuutitanik misissuiartortitseqqammerput. illoqarfik illernartuutitaasoq Irakimiunut isumannaalisaavigisussanngorlugu USA-p tunniutereerpaa.
Irakimi naalakkersuisut siulittaasuata nalunaarutaa immikkut ilisimasalinnit qularineqarpoq. Decembarimi sakkutuut politiillu 325.000-it isumannaallisaalersimanissaat qularineqarpoq. Sakkutuut politiillu ullumi 264.000-iupput.
Danskit sakkutuui Irakimi sivisunerusumik uninnganissamik naalakkersuisunit Naalagaaffiit Peqatigiinnillu piumaffigineqarunik, sakkutuut Irakimiitinnissaat sivitsorneqarsinnaasoq, danskit nunanut allanut ministeriat Per Stig Møller oqarpoq.
