Irakimi qinersinissaq perulluliorfiussangatinneqarpoq
al-Samili siornatigut peqqinnissamut ministeriusimavoq kisiannili aammattaaq sunni-musliminut toqoraajartortitanik inissiisimaneranik tusaamanerlunneqarluni.
Muslimit arlallit Saddam Husseinip partiitut attuumassuteqarfigisimasaanik Baathimik tapersersuisutut pasillerneqartut qinersinermi ilaaqqusaajunnaarput, Irakimili shiamuslimit pisortaasa arlaannaasaluunniit Hakim al-Samilip qineqqusaartunut ilaanera akerlilerneqanngivilluni. Taanna inuit amerlasoorpassuit toqunerannut pisuusutut pasillerneqaraluarpoq Saddam Husseinillu uppititaanerata kingornagut piffissami al-Samili peqqinnissamut ministerinngorluni, 2005-imiillu 2007-imut ministereqarfiup isumannaallisaanermut sullissivia sunni-musliminik 100-likkuutaanik aallarussuinermut toqoraanermullu atortassimallugu. Taanna 2008-mi toqoraanermut, qimarngussuinermut peqquserluttuliornermullu Amerikamiunit pasineqarpoq, kisiannili siullermik shia-muslimimik atorfikkaamik taassuminnga eqqartuussivimmut tunniussinissaagaluaq inuit uppernarsaasussat tatineqarsimanerarlugit pisuutitsiniarnerit pissutigalugit ullut marluk qaangiutiinnartut taamaatiinnarneqarluni. Maannali tassa al-Samili politikkikkut naakkigeqqusaartutut Ghandi issuarlugu saqqummeqqippoq akerleriissutaasumillu qinigassanngortinnera annilaangalersitsilluni tassami sunni-musliminit amerlaqisunit tamanna ulorianartorujussuarmik kinguneqartussatut isumaqarfigineqarmat.
