Irakimi oqalutsit qanoq pineqarnissaat erninnaq paasinarsissaaq
Sapaatip akunnera qaangiutsinnagu Irakimiut oqalutsit Irakimi danskit sakkutuuinik sullissisimasut qanoq pineqarumaarnersut paasinarsissaaq.
Illersornissamut ministeri Søren Gade oqarpoq maannakkorpiaq oqalutsit ataasiakkaarlugit taakkualu kissaatigisaat tunngavigalugit aaqqiissutissat ilungersuullugit suliarineqartut.
Holger Petersen paasissutissiissaaq:
Suleqatigiissitaq maannakkorpiaq Irakimi dansit najugaqarfianniippoq oqalutsillu ataasiakkaarlugit oqaloqatigisassallugit tamanna taakkua kissaatigissappassuk, ataasiakkaarlugillu oqaloqatiginerat aallaavigalugu danskit naalakkersuisuinut inassuteqaateqassalluni, qularnanngitsumillu sapaatip akunnerata tulliani, taannalu soorunami iliuuseqarfigissavarput. Oqalutsit 21-t danskit najugaqarfianni atorfeqarput, tamarmilli danskinik sullissisimanertik pillugu akiniarneqarnissartik annilaanngatiginngilaat, Søren Gade oqaluttuarpoq. Oqalutsit ¾-iisa isumannaallisaavigineqarnissartik pillugu oqaloqatigineqarnissartik piumasaraat, taannalu maannakkut suliaraarput aammalu oqalutsit ataasiakkaat massakkorpiaq pisariaqartitaat aallaavigalugit aaqqiissuteqartoqassalluni. Qanittukkut tusarliunneqarpoq tappavani Danidami sulisoq siornatigullu Irakimi danskit sakkutuuinut oqalutsi decemberimi toqutaasimasoq, Søren Gadellu taamaattumik erseqqissarpaa kinaluunniit siornatigut sulisuusimasoq isumannaallisaavigineqarnissani pillugu oqaloqatigineqarsinnaassasoq.
