Irakimi naalakkersuisussat aalajangerneq ajulerpaat
Irakimi naalakkersuinermik suliaqartut naalakkersuisooqatigiinnik pilersitsisinnaanngimmata amerikamiut tuluillu nunanut allanut ministerii akuliunnialerput.
Condoleezza Rice Jack Strawilu ilimagineqaratik Bagdadimut tikipput sukkanerusumik irakimiut naalakkersuisooqatigiinnik pilersitsinissaat anguniarlugu.
Irakimi qaammatit sisamat matuma siorna qinersisoqareersoq naalakkersuisooqatigiinnik pilersitsisussatut Ibrahim Al Jafari qinigaavoq. Taassuma piusaarussinera amerikamiut tuluillu nunanut allanut ministerinit utaqqikatanneqarpoq. Condoleezza Rice Jack Strawilu naalakkersuisooqatigiinnermi kina siuttuussanersoq akuliuffiginiarnagu erseqqissaapput. Taamatut nalunaaruteqarnerminni iluatsillugu eqqaavaat naalakkersuisooqatigiinnik pilersitsisoqarumaataarnerata kingunerisaanik innuttaasut eqqissiviilliortitsineri sakkortusiartorusaarsimasut.
Amerikamiut tuluillu nunanut allanut ministeriisa Ibrahim Al Jafarip allamik taarserneqarnissaa kissaatigaat. Jack Strawip toqqaannarnerusumik tamanna ima nalunaarutigaa:
- Amerikamiut 2000-init amerlanerusut annaareerpaat uagullu 100-t sinnerlugit annaareerpagut nunanillu allamiut sakkutuui 140.000-t sinnerlugit maani eqqissisimatitsiniarlutik najuupput. Pilliutigut naammalermata naalakkersuisooqatigiinnik pilersitsisoqartariaqalerpoq, tuluit nunanut allanut ministeriat Jack Straw oqarpoq.
Sunnit kurderillu Ibrahim Al Jafarip naalakkersuisooqatigiinnik pilersitsisinnaanngimmat tunuarniuteqarnissaa kissaatigaat. Amerikamiut tuluillu taamaalillutik anguniagartik pilertornerusumik angusinnaalissannguatsiarpaat Irakimilu akersuuttaqattaarnerit unitsinneqarsinnaanerat aqqutissiuunneqassalluni.
