Irakimi ministeriuneq: -Saddamip toqutaanera nunat allat susassarinngilaat!
Saddam Husseinip toqutaanera pillugu nunat isornartorsiuisut maanna Irak-ip ministeriunerata qunusaarpai.
- Naalagaaffiup iluani pisoq pisuummat nunat allat susassarinngilaat, Irak-ip ministeriunera taama oqarpoq.
Ministeriunerup taassuma nunat siuttui isornartorsiuisut sorliit pinerlugit oqaatigeqqaannguarnagit nunat Saddam Husseinip toqutaaneranut akerliusut apeqquserpai, taamalu Irak-imut suleqatiginninnerat eqqarsaatigeqqittariaqarnerarlugu siorasaaraluni.
Irak-imi ministeriunerup aamma erseqqissaatigaa Saddam-ip qimitaanera Irak-imiunuinnaq tunngasuummat.
Taamatuttaaq oqaatigaa kisermaassilluni naalakkersuisuusimasumik qimitsilluni toqutsineq politikkikkut attuumassuteqanngimmat eqqartuussivikkulli piffissarujussuaq atorlugu suliarineqareerluni inerniliinerummat.
Ministeriuneq taanna taama oqaaseqarpoq, Egyptenip præsidentiata Hosni Mubarak-ip qimitsinermi assilineqarsimasut ”Amiilaarnartutut naakkittaatsuliornertullu” uparuarmagit.
Aammattaaq Tysklandip nunanut allanut ministeriata toqutsineq tamanna kikkut tamarmik alapernaasigaattut taavaa, taamalu Saddam Husseinip naalliutitaalluni toqutaanera upperisaq pillugu imminut pilliutigisutut taallugu.
