Irakimi inuit 49-t toqutaasut
Irakip avannarpasissuani illoqarfeeqqat ilaanni ilisisoqarnerata nalaani imminut toquutigaluni ullaaq qaartartumeerisoqarmat inuit ikinnerpaamik 49-t toqutaapput.
Allattoq Louise M. Kleemann
apriilip 17-at 2008 07:34
Tuluit nutaarsiassaqartitsiviat Reuters naapertorlugu inuit ikinnerpaamik 49-t toqutaapput 50-illu ikiligaallutik. Qaammatip ataatsip ingerlanerani aatsaat taama aattaqartigisumik pisoqarpoq.
Illoqarfeeqqami qaartartumeeriffiusumi politiit pisortaat oqarpoq, al-Qaedakkunnut akiuinianut ilaasortat marluk toqutaasimasut ilisaanerannut atatillugu katersuuteruttorlutik qaartartumeerisoqartoq.
Angutit marluk taakku ullut marlussuit matuma siorna toqutaapput.
USA-mit Bagdadimilu naalakkersuisunit tapersersorneqarluni al-Qaeda-kkunnut ilaasortanik akiuiniartunik Irakimi tamarmi qaammatini kingullerni arlalinni suleqatigiissitalianik pilersitsisoqarsimavoq
Suleqatigiissitat taakku sorsukkumatuunit arlaleriarlutik saassunneqareerput.
