Iraki pillugu politikki allanngortinniarneqarpoq

USA-mi Iraki pillugu ataatsimiititaliaq ullumi ataatsimiissaaq, præsident George W. Bushilu ataatsimeeqataassaaq.

Iraki pillugu allamut sanguniartoqalerunartoq Buship sinnerlugu ataatsimeeqataasussat oqarput, Iranilu Syrialu ilaatigut taaneqarlutik.

Qanoq-una iliorniartugut? Apeqqut taanna politikkikkut suliallit akornanni ataatsimiinnermi akissutissarsiniarneqarpoq.

Iraki pillugu politikkimi naleqqussaasoqarniartoq, Det Hvide Husimi sulisunut siuttoq Joshua Bolten oqarpoq.

Iraki pillugu ataatsimiititaliaq USA-mi inatsisartunit pilersinneqarnikuuvoq, USA-llu Irakimut tunngatillugu politikkimini naleqqussaaniassappat Iran aamma Syria avaqqunneqarsinnaassagunanngillat.

Tuluillu Nunaata premierministeriat Tony Blair taamaattumik siunnersuuteqarnissaa aamma ilimagineqarpoq.

Taannami isumaqarpoq Iran aamma Syria paasiniaavigineqaqqaartariaqartut Iraki pillugu politikkimik allannguiniaraanni.