Irak uuliasiornermi siuttunngorusuppoq
Irakimiut nunami allamiut ingerlatseqatigiiffiinik nunap uuliamik qalluinissamut qulissaanik isumaqatigiissutissartik ippassaq naammassivaat.
Siullermik assiliisoqarpoq, taava atsiortitsisoqarpoq naggataatigullu ersaartaattoqarluni. Irak russit uuliasiortitseqatigiiffiannik Nogoilimik norskillu pigisaannik Statoilimik ippassaq isumaqatigiissuteqarpoq. Uuliasiortitseqatigiiffiit taakkua marluullutik ukiuni tulliuttuni 20-ni nunarsuarmi uuliaqarfiit iluaqutigineqanngitsut annersaasa ilaat isumagilissavaat, tamannalu Irakip uuliasiornermut ministeriata nuannaarutigaa. Ministeri taanna sap. akunnerata naanerani oqarpoq Irakip ukiuni tulliuttuni arfinilinni arfineq-marlunni uuliamik tunisassiortuni annerpaanngornissaa siunertarineqartoq, uulialu ullormut nappartat 12 millionit tunisassiarisinnaassallugit, ullumikkut Saudi Arabiap inoqajuitsumiittup nunarsuarmi niuernikkut siuttuusup tunisassiarisartagaasut amerlatigisut, tassami Irakip uulia akisooq iluanaarutigissammagu aningaasallu agguataarnissaat nunap siunissaanut pingaaruteqarmat. Irakimiut ukiorpassuarni aaqqiagiinnginnernik sorsunnernillu nalaataqartarput, uuliamillu iluanaarutit ineriartornermik atugarissaarnermillu pilersitsisinnaallutik. Aammattaarli aningaasat aaqqiagiinngissutinik amerlanerusunik pilersitsisinnaapput, Afrikap nunavittaani, kingullermik Nigeriami, takuneqarsinnaasutulli. Irakimi naalakkersuisut uppernarsaapput iluanaarutit innuttaasunit pissarsiarineqassasut. Aningaasat sorsunnermut atorneqassanngillat, siornatigut kisermaassilluni naalakkersuisuusimasup Saddam Husseinip uuliamit iluanaarutinik aqutsisimanera eqqaaneqarluni. Irakimi naalakkersuisut nunanilu allani uuliasiortitseqatigiit akornanni isumaqatigiissuteqartoqarnera ersaartaannerillu nutaarsiassaqartitsivik Reuters malillugu nalaatsornerinnaanngillat, tassami qinersisoqangajalerpoq taamaattumillu atsiornerit naammassinissaat pingaaruteqarluni.
