Irak pillugu USA inorsarnerarneqartoq
USA Irakimut tunngatillugu anguniakkaminut inorsarujussuarpoq.
Præsident Buship Iraki pillugu nassuiaatissaa sioqqutitsiarlugu, kongressip nassuiaataani tamanna takuneqarsinnavoq.
Amerikami tusagassiorfiit arlallit nalunaarusiaq pissarsiarereersimavaat naak suli pisortatigoortumik saqqummiunneqanngikkaluartoq.
Nalunaarusiami takuneqarsinnaavoq, politikikkut isumannaallisaanermi suliniarneq ajorluinnartoq.
Naak, ukiup matuma aallartilaarnerani præsident Buship sakkutuut 30.000-nik ilasimagaluarai.
Tassunga tunngatillugu kongressip piumasaraa Irakimut aningaasaliissutaasimasut, Irakimi oqartussaasut taarsiullugu amerikamiut sakkutuuinut tunngatillugu nutaamik nutaamik arlaatigut pilliuteqassasut, anguniakkallu aalajangersimaqqissaartut pillugit qaammatip tulliani Buship nassuiaammini tamakkua qanoq ingerlasimanersut saqqummiutissagai.
Julimi naalakkersuisut utaqqiisaasumik nassuiaammik saqqumiisoqarnissaanut isumalluarsimapput.
Nalunaarusiarlu maannakkut kongressip allaffeqarfianiit saqqummiunneqartoq naliliinernik isumalluarnanngeqisunik nipeqarpoq.
Soorlu aamma Præsident Bush septemberimi nalunaarusiaq saqqummiussassaa taama nipeqassagatinneqartoq.
Washington Postimit allaaserineqartut malillugit,
Irakimiut angunikkani 18-iusuni pingasuinnaat naammassisinnaasimavaat.
Nutaarsiassaqartitsiviup Association Pressip nalunaarusiaq kongressip saqqummiussaa aamma takusimavaa, Irakimilu politikikkut anguniakkani 18-niusuni arfiniliinnaat iluatsissimasutut naliliivigalugit.
Isumannaallisaanerup iluani iluatsissimasut killilerujussuupput, politikikkullu anguniakkat annertunerit anguneqarsimanatik.
Soorlu assersuutigalugu uuliamit isertitat qanoq agguaanneqartarnissaannut pingaarutilimmik inatsisissamik suli akuersisoqarsimanngilaq.
Isumannaallisaanermut tunngatillugu kongressip nalunaarusiaani takuneqarsinnaavoq, amerikamiut sakkutuuinik saassussisarnerit annikilleriarsimasut.
Irakimili assigiinngitsunik upperisallit akornanni angutaasertarnerit appariaateqarsimanatik.
Præsident Buship Irakimi ineriartorneq pillugu naliliinermini tunngaviginiarsimavai ilaatigut, Irakimi sakkutuut qullersaata nassuiaataa, aammalu amerikamiut Irakimi siniisuutitatut aallartitaata naliliinera tunngavigisimallugu.
USA-mi Kongressi Irakimut tunngatillugu marlunnik assigiinngitsunik misissuisitsisimavoq, siullermik nammineq misissuisitsisimavoq, aappassaanillu generali soraarninngorsimaasoq aamma misissuisisimallugu, misissuisitsisimanerit naalakkersuisut misissuisitsisimanerannut sanilliussinerupput.
