Irak-imi inuit 125-it toqutaapput

Irak-imi sapaatip akunnerata naanerani akersuuffiungaatsiarsimavoq. Bagdag-imi politiingorniat 35-it politeeqarfiup silataani ullaaq qaartaartumeerneqarlutik toqutaapput. Toqutsisut tassaapput angutit marluk imminuutigalutik qaartartumeerisut. Inuit 60-it missaanniittut ikilertitserneqarput, Irak-imi isumannaallisaanermut tusarfiit nalunaarput. Bagdag-imi Irak-imiut inuinnaat 125-it ulluni kingullerni tallimani toqutaapput. USA-mi Det Hvide Hus Irak-imi nunap naalakkersuinikkut naleqqussarneqarnissaanut piareersimalluni nalunaarsimavoq. Nunami oqartussaaqataanerup aalajaatsuunissaatalu atuutilersinnissaa suliassanut pingaarnertut siunniunneqarput. Det Hvide Hus-imi oqaaseqartartoq, Joshua Bolten, nutaarsiassaqartitsivimmut CNN-imut ullumi oqarpoq. Oqaaseqartartup ilanngullugu oqaatigaa, Irak-imi ullumikku pisut kialluunniit iluarilersinnaanngikkaa, allannguuteqartoqartariaqartorlu. Tamannalu amerikami illersornissamut ministerinngortussap Robert Gates-ip suliariumaaraa Joshus Bolten oqarsimavoq. Robert Gates-ip Donald Rumsfeldt pingasunngormat illersornissamut ministeritut tunuartoq taarsissavaa,Rumsfeldt tunuarpoq Amerikami qinersinivissap tungaanut qinersigallarnermi Republikanerit ajorsarnerisa kingorna.